2025 جىلى «دامۋ» كاسىپكەرلىكتى دامىتۋ قورى باسقارما مۇشەلەرىنىڭ سىياقىسىنا 315،4 ملن تەڭگە جۇمساعان. بۇل بىلتىرعى كورسەتكىشتەن 34،9%-عا كوپ، دەپ حابارلايدى infohub.kz سايتى.
الايدا ءبىر باسقارما مۇشەسىنە شاققانداعى ورتاشا سىياقى ءسال تومەندەگەن. 2024 جىلى بەس باسشىنىڭ ءارقايسىسىنا ورتا ەسەپپەن 46،8 ملن تەڭگە تيەسىلى بولسا، 2025 جىلى بۇل كورسەتكىش 45،1 ملن تەڭگەنى قۇراعان. تومەندەۋ شامامەن 3،7%-دى قۇرادى، سەبەبى باسقارما قۇرامى بەس ادامنان جەتى ادامعا دەيىن ۇلعايعان.
سوڭعى بەس جىلداعى تولەم ديناميكاسى تومەندەگىدەي. 2025 جىلى باسقارمادا 7 مۇشە بولىپ، جالپى سىياقى 315،4 ملن تەڭگە، ءاربىر مۇشەگە ورتا ەسەپپەن 45،1 ملن تەڭگە (2024 جىلمەن سالىستىرعاندا 3،7%-عا تومەن). 2024 جىلى 5 مۇشەگە 233،8 ملن تەڭگە، ورتاشا 46،8 ملن تەڭگە (2023 جىلعا 31،4%-عا ءوسىم). 2023 جىلى 6 مۇشەگە 213،5 ملن تەڭگە، ورتاشا 35،6 ملن تەڭگە (2022 جىلعا 11،2%-عا ءوسىم). 2022 جىلى 6 مۇشەگە 191،9 ملن تەڭگە، ورتاشا 32،0 ملن تەڭگە (2021 جىلعا 0،8%-عا ءوسىم). 2021 جىلى 5 مۇشەگە 158،7 ملن تەڭگە، ورتاشا 31،7 ملن تەڭگە (2020 جىلعا 22،2%-عا ءوسىم). 2020 جىلى 7 مۇشەگە 181،8 ملن تەڭگە، ورتاشا 26،0 ملن تەڭگە.
2020 جىلمەن سالىستىرعاندا، ءبىر باسقارما مۇشەسىنىڭ جىلدىق ورتاشا سىياقىسى 73،5%-عا، ياعني 19،1 ملن تەڭگەگە وسكەن.
«دامۋ» قورى – شاعىن جانە ورتا بيزنەستى قولداۋمەن اينالىساتىن مەملەكەتتىك دامۋ ينستيتۋتى. قور ارقىلى كاسىپكەرلەر نەسيە بويىنشا سۋبسيديالار، كەپىلدىكتەر، جەڭىلدىكتى قارجىلاندىرۋ جانە وزگە دە مەملەكەتتىك قولداۋ شارالارىن الادى.
قوردىڭ جالعىز اكسيونەرى – «بايتەرەك» ۇلتتىق باسقارۋشى حولدينگى.
بۇعان دەيىن «دامۋ» قورى شاعىن جانە ورتا بيزنەستى قولداۋعا 271 ملرد تەڭگە بولەتىنى حابارلانعان.