قازاقستاندىق تەننيسشى اننا دانيلينا مەن ونىڭ جاپوندىق ارىپتەسى ميۋ كاتو مونتەررەيدەگى WTA-500 تۋرنيرىندە شيرەك فينالدا رەسەيلىك-بريتاندىق ماريا كوزىرەۆا مەن ماييا ليمسدەن جۇبىنان 3:6، 7:6 (8:6)، 3:10 ەسەبىمەن ۇتىلىپ، جارىستى اياقتادى، دەپ حابارلايدى infohub.kz.
كەزدەسۋ 1 ساعات 36 مينۋتقا سوزىلدى. ءبىرىنشى سەتتە قارسىلاستار باسىم ءتۇستى، ال ەكىنشى سەتتە دانيلينا مەن كاتو تاي-برەيكتە 5:6 ەسەبىمەن ۇتىلىپ تۇرىپ، قاتارىنان ءۇش ۇپايدى يەلەنىپ، پارتيانى 8:6 ەسەبىمەن ءوز پايداسىنا شەشتى. سۋپەرتاي-برەيكتە قازاقستاندىق-جاپوندىق جۇپ ساتسىزدىككە ۇشىراپ، 3:10 ەسەبىمەن جەڭىلىپ قالدى. جالپى ۇپاي ستاتيستيكاسى — 68:78، قارسىلاستاردىڭ پايداسىنا.
مونتەررەي تۋرنيرىنەن كەيىن دانيلينا نيۋ-يورككە اتتانىپ، سەربيالىق تۇراقتى ارىپتەسى الەكساندرا كرۋنيچپەن قوسىلادى. كرۋنيچ حورۆاتيالىق ماتە پاۆيچپەن جۇپتاسىپ، US Open-2026 ارالاس جۇپتا ساتتىلىككە جەتە المادى.
قازاقستاندىقتار بۇل تۋرنيردە ميكستكە قاتىسپادى. الەكساندرا بۋبليكتىڭ ارىپتەسى ۆينۋس ۋيليامس جاراقاتىنا بايلانىستى جارىستان شىعىپ قالدى، سونداي-اق تەيلور فريتسپەن جۇپتاسۋى ءتيىس ەلەنا رىباكينا دا قاتىسا المادى. رىباكينانىڭ US Open-2026 جەكە سىندا ويناۋى دا سينسينناتيدە العان احيلل جاراقاتىنا بايلانىستى كۇمان تۋدىرىپ وتىر.
دەگەنمەن، امەريكاندىق مەيدجوردا بىردە-بىر ماچ ويناماسا دا، رىباكينا تاريحتا تۇڭعىش رەت الەمنىڭ ءبىرىنشى راكەتكاسى اتانۋى مۇمكىن. ول ءۇشىن US Open-2026 جەڭىمپازى ارينا سوبولەنكو، دجەسسيكا پەگۋلا نەمەسە كوكو گاۋفف بولماۋى كەرەك.
اقش-تىڭ اشىق تەننيس چەمپيوناتى — حاردتا وتەتىن جىل سايىنعى «ۇلكەن دۋلىعا» ءتۋرنيرى، كۇنتىزبەلىك جىلداعى ءتورت مەيدجوردىڭ سوڭعىسى. العاش رەت 1881 جىلدىڭ تامىزىندا وتكەن US Open، ەكىنشى جىل قاتارىنان ميكست ءتۋرنيرىنىڭ كەستەسىنە بايلانىستى ءبىر اپتا ەرتە باستالادى. جالپى جۇلدە قورى — $108 ملن — مەيدجورلار اراسىندا رەكوردتىق.
1978 جىلدان بەرى ماچتار نيۋ-يوركتەگى فلاشينگ-مەدوۋز-كورونا ساياباعىنداعى بيللي دجين كينگ اتىنداعى ۇلتتىق تەننيس ورتالىعىندا وتەدى. قازىرگى چەمپيوندار — يسپانيالىق كارلوس الكاراس پەن بەلارۋس ارينا سوبولەنكو.