قازاقستان دەنساۋلىق ساقتاۋ مينيسترلىگى الماتى وبلىسىنداعى اقتاس كەنتىندەگى پسيحياتريالىق اۋرۋحانادا ناۋقاستارعا قاتىگەزدىكپەن قاراۋ تۋرالى اقپاراتتى رەسمي تۇردە جوققا شىعاردى. بۇل اقپارات بۇعان دەيىن ينتەرنەتتە تاراپ، قوعامدا كەڭ رەزونانس تۋدىرعان ەدى، دەپ حابارلايدى infohub.kz.
تەكسەرۋگە ب ا ق پەن الەۋمەتتىك جەلىلەردەگى جاريالانىمدار سەبەپ بولدى. وندا بۇرىنعى ناۋقاستار مەكەمەدەگى كوپتەگەن بولجامدى بۇزۋشىلىقتار، ونىڭ ىشىندە پەرسونال تاراپىنان ازاپتاۋ مەن قاتىگەزدىك تۋرالى ايتقان. مىسالى، جاريالانىم كەيىپكەرلەرىنىڭ ءبىرى ادامداردى كەرەۋەتكە بايلاپ، پالاتالاردى، دالىزدەر مەن دارەتحانالاردى جۋۋعا ماجبۇرلەگەنىن ايتقان. بۇرىنعى ناۋقاستار ايتقان باسقا دا وقيعالار كەلتىرىلگەن.
قوعامدىق رەزونانستان كەيىن دەنساۋلىق ساقتاۋ ءمينيسترى اقمارال ءالنازاروۆا تەكسەرۋ جۇرگىزۋدى تاپسىردى. مەديسينالىق مەكەمەدەگى جاعدايدى دەنساۋلىق ساقتاۋ مينيسترلىگىنىڭ الماتى وبلىسى بويىنشا مەديسينالىق جانە فارماسەۆتيكالىق باقىلاۋ كوميتەتىنىڭ دەپارتامەنتى زەرتتەدى.
«2026 جىلعى 7 تامىزداعى №127 تەكسەرۋ ناتيجەلەرى تۋرالى اكتىگە سايكەس، ناۋقاستارعا فيزيكالىق شەكتەۋلەر قولدانۋ، اسەر ەتۋ شاراسى رەتىندە دارىلىك پرەپاراتتاردى قولدانۋ جانە ناۋقاستاردىڭ قادىر-قاسيەتىن قورلايتىن وزگە دە ارەكەتتەر تۋرالى مالىمەتتەر راستالمادى. وسىلايشا، جاريالانىمدا كەلتىرىلگەن مالىمدەمەلەر رەسمي تەكسەرۋ بارىسىندا انىقتالعان ناقتى ءمان-جايلارعا سايكەس كەلمەيدى»، — دەلىنگەن مينيسترلىكتىڭ رەسمي مالىمدەمەسىندە.
ۆەدومستۆو كەيبىر اڭگىمە اۆتورلارى 18 جىل بۇرىنعى جەكە ەستەلىكتەرگە سىلتەمە جاسايتىنىن، سوندىقتان 2008-2010 جىلدارداعى بولجامدى وقيعالاردى تەرگەۋ مۇمكىن ەمەس ەكەنىن اتاپ ءوتتى.
اقتاستاعى رەسپۋبليكالىق پسيحياتريالىق اۋرۋحانا — قازاقستانداعى وسىنداي جالعىز مەكەمە. مۇندا سوت ماجبۇرلەپ ەمدەۋ شارالارىن تاعايىنداعان ناۋقاستار جاتىر. دەنساۋلىق ساقتاۋ مينيسترلىگىنىڭ دەرەگىنشە، مەكەمەدەگى ناۋقاستاردىڭ 80 پايىزىنان استامى ادامعا قارسى اۋىر جانە اسا اۋىر قىلمىس جاساعاندار.
ۆەدومستۆو مەديسينالىق كومەك ساپاسى مەن ناۋقاستاردىڭ قۇقىقتارىنىڭ ساقتالۋىن باقىلاۋدى جالعاستىراتىنىن مالىمدەدى.