مەملەكەت مەديسينالىق بيۋدجەتتىڭ اعىپ كەتۋ ارنالارىن جاۋىپ تاستادى. سيفرلىق باقىلاۋدى ەنگىزۋ ميللياردتاعان تەڭگەگە جەتەتىن جالعان جازبالاردى انىقتاۋعا، سونداي-اق ليسەنزياسىز پاسيەنت قابىلداعان 40-قا جۋىق كلينيكانى انىقتاۋعا كومەكتەستى، دەپ حابارلايدى infohub.kz سايتى.
اتاپ ايتقاندا، دەنساۋلىق ساقتاۋ مينيسترلىگى مەديسينالىق اقپاراتتىق جۇيەلەردە 400 مىڭ وزەكتى ەمەس پاسيەنت كارتاسىن انىقتاپ، ولاردى جويدى. «بۇل مەديسينالىق كومەك پەن دارى-دارمەككە جۇمسالاتىن نەگىزسىز شىعىنداردىڭ 31 ملرد تەڭگە كولەمىندە بولدىرماۋعا مۇمكىندىك بەردى»، — دەلىنگەن ۆەدومستۆو حابارلاماسىندا.
مينيسترلىكتە سيفرلىق سايكەستەندىرۋ پاسيەنتتىڭ ءوتىنىش فاكتىسىن راستايتىنىن جانە جالعان جازبالاردى بولدىرمايتىنىن، فورماتتىق-لوگيكالىق باقىلاۋ وقيعانى ساقتاۋعا دەيىن تەكسەرەتىنىن، ال ءبىرىڭعاي تولەم جۇيەسى كومەك كولەمى مەن ساپاسىن تەكسەرەتىنىن اتاپ ءوتتى.
«وسىلايشا، ناتيجە ولشەنەتىن بولدى. تولەم كەزىندە اقاۋلاردى انىقتاۋ 3،5 ەسە ءوستى. قىزمەتتەردى نەگىزسىز تۇتىنۋ 7،1%-عا تومەندەدى، بۇل شامامەن 7 ملرد تەڭگە. 10،6 ملرد تەڭگەگە جەتەتىن اسىرا كورسەتۋلەر انىقتالدى. تەك جان باسىنا شاققانداعى نورماتيۆ بويىنشا بەلسەندى ەمەس الۋشىلار بويىنشا اسەر 3،2 ملرد تەڭگەنى قۇرادى»، — دەلىنگەن حابارلامادا.
سونىمەن قاتار، رەسۋرستاردى باسقارۋدىڭ سيفرلىق جۇيەسى ارقىلى تاۋەكەلگە باعىتتالعان قاداعالاۋ قولدانىستاعى ليسەنزياسىز جۇمىس ىستەگەن 40-قا جۋىق ۇيىمدى انىقتاۋعا مۇمكىندىك بەردى، ونىڭ بەسەۋىنىڭ قىزمەتى توقتاتىلدى. سونداي-اق مەرزىمى وتكەن سەرتيفيكاتتارى بار 2 مىڭنان استام مامان انىقتالدى، ونىڭ 50-دەن استامى جۇمىستان شەتتەتىلدى.
بۇعان دەيىن دەنساۋلىق ساقتاۋ مينيسترلىگى مەديسينا قىزمەتكەرلەرىنىڭ بۇكىل مانسابىن ءبىرىڭعاي سيفرلىق جۇيەگە كوشىرگەنى بەلگىلى بولعان ەدى. بۇل جۇيە ماماننىڭ مەديسينالىق كوللەدجگە تۇسكەننەن باستاپ بىلىكتىلىگىن ارتتىرۋعا، جۇمىسقا ورنالاسۋىنا جانە جۇمىس ورنىن اۋىستىرۋىنا دەيىنگى بارلىق جولىن قاداعالايدى.