قازاقستاندا بانكتەر تۋرالى جاڭا زاڭ كۇشىنە ەندى. بۇل زاڭ پروبلەمالى بانكتەردىڭ سالىمشىلارىنا تولەمدەردى جەدەلدەتەدى. ەندى قازاقستاندىق دەپوزيتتەرگە كەپىلدىك بەرۋ قورىنىڭ (قدكق) رەزەرۆىنەن وتەماقى تولەۋدىڭ ەڭ ۇزاق مەرزىمى 35 جۇمىس كۇنىنەن 20 جۇمىس كۇنىنە قىسقاردى، دەپ حابارلايدى infohub.kz سايتى.
قوردىڭ مالىمەتىنشە، ءتيىستى وزگەرىستەر جاڭا بانك زاڭناماسىندا بەكىتىلگەن جانە سالىمشىلاردىڭ قۇقىعىن قورعاۋدى كۇشەيتۋگە باعىتتالعان. ءىس جۇزىندە تولەمدەر بۇرىنعى نورماتيۆتەردەن الدەقايدا ەرتە باستالاتىن. مىسالى، Tengri Bank، «ازياكرەديت بانك» جانە Capital Bank Kazakhstan كومپانيالارىنىڭ ليسەنزياسى قايتارىلعاننان كەيىن سالىمشىلار 6–8 جۇمىس كۇنى ىشىندە وتەماقى الۋعا ءوتىنىش بەرە الدى. وسى ءۇش بانك بويىنشا تولەمدەردىڭ جالپى سوماسى 38 ملرد تەڭگەدەن استى.
قدكق تولەمدەردى باستاۋ مەرزىمىن ودان ءارى قىسقارتۋدى جوسپارلاپ وتىر. ول ءۇشىن جەتكىلىكتى قارجىلىق بازا قالىپتاستىرىلعان: قوردىڭ ارنايى رەزەرۆى 1،7 ترلن تەڭگەدەن اسىپ، زاڭدا بەلگىلەنگەن نىسانالى دەڭگەيدەن جوعارى.
بۇعان دەيىن قازاقستان ۇكىمەتى 2026-2029 جىلدارعا ارنالعان حالىقتىڭ تابىسىن ارتتىرۋدىڭ كەشەندى جوسپارىن بەكىتكەن بولاتىن. قۇجاتتىڭ نەگىزگى تارماقتارىنىڭ ءبىرى – مەملەكەتتىك قولداۋ الاتىن بيزنەس ءۇشىن جاڭا مىندەتتەمەلەر.