قازاقستاندا جەكە تۇلعالاردىڭ دەپوزيت كولەمى 30 تريلليون تەڭگەدەن استى، ال ۆاليۋتالىق سالىمداردىڭ ۇلەسى جالپى سومانىڭ 20 پايىزىنان از بولدى. ءوسىمنىڭ بارلىعى دەرلىك (96%) تەڭگەلىك دەپوزيتتەر ەسەبىنەن قامتاماسىز ەتىلدى، دەپ حابارلايدى infohub.kz سايتى.
بۇعان دەيىن قازاقستاندىقتاردىڭ بانك دەپوزيتتەرىندەگى قاراجاتىنىڭ جالپى سوماسى العاش رەت 30 تريلليون تەڭگەدەن اسقانى حابارلانعان بولاتىن. دەپوزيتتەرگە كەپىلدىك بەرۋ قورىنىڭ (كفگد) دەرەكتەرىنە سايكەس، 2026 جىلدىڭ ەكىنشى توقسانىندا ءوسىم 1،9 تريلليون تەڭگەنى قۇراپ، كەپىلدىك بەرۋ جۇيەسى تاريحىنداعى ءابسوليۋتتى رەكوردقا اينالدى. ءبىر جىل ىشىندە دەپوزيتتەر 4،6 تريلليون تەڭگەگە ءوستى. ايتا كەتەيىك، ءوسىمنىڭ بارلىعى دەرلىك (96%) ۇلتتىق ۆاليۋتاداعى سالىمدار ەسەبىنەن قامتاماسىز ەتىلدى.
ساراپشىلار مۇنداي ديناميكانى دەپوزيتتەر بويىنشا جوعارى سىياقى مولشەرلەمەلەرىمەن بايلانىستىرادى. بازالىق مولشەرلەمە 18% بولعان كەزدە بانكتەر جەكەلەگەن ونىمدەر بويىنشا جىلدىق 20–20،5% دەيىن ۇسىندى. ال ۆاليۋتالىق سالىمدارعا كەلەر بولساق، ەكىنشى توقساندا ولار نەبارى 25،6 ميلليارد تەڭگەگە ءوستى. ونىڭ ۇستىنە، ولاردىڭ تەڭگەلىك كورسەتكىشتەگى كولەمىنىڭ ءوسۋىنىڭ ەداۋىر بولىگى ناقتى اقشا اعىنىمەن ەمەس، ۆاليۋتانى قايتا باعالاۋمەن بايلانىستى بولدى. ناتيجەسىندە ۆاليۋتالىق سالىمداردىڭ جالپى سوماداعى ۇلەسى رەكوردتىق مينيمۋمعا – 19،8%-عا ءتۇستى. سالىستىرۋ ءۇشىن: 2015 جىلى ۆاليۋتالىق دەپوزيتتەردىڭ ۇلەسى 80%-عا جەتكەن ەدى.
بارلىق دەپوزيتتەردىڭ جارتىسىنا جۋىعى (49،3%) قالدىعى 15 ميلليون تەڭگەگە دەيىنگى شوتتارعا تيەسىلى. بۇل جاپپاي سەگمەنت دەپ اتالادى جانە ونىڭ ۇلەسى تۇراقتى تۇردە تومەندەپ كەلەدى. تۇسىنىكتى بولۋ ءۇشىن: 2021 جىلى وعان بارلىق قاراجاتتىڭ 55،1% تيەسىلى ەدى. ال ورتا سەگمەنتتىڭ ۇلەسى، كەرىسىنشە، ءوستى، مۇندا 15-تەن 50 ميلليون تەڭگەگە دەيىن ساقتالادى. 2021 جىلى وعان نەبارى 12،2% تيەسىلى بولسا، ءقازىر – 19،2%. ءىرى سەگمەنتكە (قالدىعى 50 ميلليون تەڭگەدەن جوعارى) جيناقتىڭ 31،5% تيەسىلى.
اناليتيكتەردىڭ پىكىرىنشە، ورتا سەگمەنت ۇلەسىنىڭ ارتۋى سالىمشىلاردىڭ ءال-اۋقاتىنىڭ بىرتىندەپ جاقسارىپ كەلە جاتقانىن كورسەتەدى جانە بانكتەر اراسىندا اۋقاتتى كليەنتتەر ءۇشىن باسەكەلەستىكتىڭ جۇيەلى تۇردە كۇشەيىپ كەلە جاتقانىن بىلدىرەدى. ايتا كەتەيىك، بۇعان دەيىن ۇلتتىق بانك بازالىق مولشەرلەمەنى تومەندەتكەن بولاتىن، ال ودان كەيىن ەكىنشى دەڭگەيلى بانكتەر دە دەپوزيتتەر بويىنشا پايىزداردى تومەندەتە باستادى. الايدا ساراپشىلار بۇل دەپوزيتتىك بازانىڭ تومەندەۋىنە نەمەسە ونىڭ ءوسۋىنىڭ ايتارلىقتاي باياۋلاۋىنا اكەلمەيدى دەپ سانايدى – حالىق ءۇشىن بانكتىك سالىمدار جيناقتاۋدىڭ نەگىزگى قۇرالى بولىپ قالا بەرەدى.