قانت ديابەتى مەن سەمىزدىككە قارسى قولدانىلاتىن تانىمال پرەپاراتتار نەۆرولوگيادا جاڭا قولدانىس تابۋى مۇمكىن. infohub.kz سايتىنىڭ حابارلاۋىنشا، زەرتتەۋشىلەر ولاردىڭ باسسۇيەك ىشىلىك قىسىمدى تومەندەتۋ جانە باس اۋرۋىنىڭ جيىلىگىن ازايتۋ الەۋەتىن انىقتاعان.
گليۋكاگون ءتارىزدى پەپتيد-1 (GLP-1) رەسەپتورلارىنىڭ اگونيستەرى باستاپقىدا ەكىنشى ءتيپتى قانت ديابەتى مەن سەمىزدىكتى ەمدەۋگە ارنالعان. الايدا ولار ميگرەن مەن يديوپاتيالىق باسسۇيەك ىشىلىك گيپەرتەنزيانى (يبگ) ەمدەۋدە ءۇمىت كۇتتىرەتىن ناتيجەلەر كورسەتۋدە. شەتەلدىك باسىلىمدا جاريالانعان عىلىمي شولۋ بۇل پرەپاراتتاردى تىكەلەي ماقساتىندا ەمەس (off-label) قولدانۋ اتالعان نەۆرولوگيالىق پاتولوگيالاردا ءتيىمدى بولۋى مۇمكىن ەكەنىن كورسەتتى.
عالىمداردىڭ ايتۋىنشا، GLP-1 رەسەپتورلارى ميدىڭ تامىرلى شوعىرىندا دا ورنالاسقان. وسىنىڭ ارقاسىندا پرەپاراتتار ج ۇلىن سۇيىقتىعىنىڭ سەكرەسياسىن تومەندەتە الادى جانە باسسۇيەك ىشىلىك قىسىمدى ازايتادى. كلينيكالىق باقىلاۋلار بارىسىندا GLP-1 اگونيستەرىن قابىلداۋ باس اۋرۋى ۇستامالارىنىڭ جيىلىگىنىڭ تومەندەۋىمەن، كورۋ جۇيكەسىنىڭ ءىسىنۋىنىڭ ازايۋىمەن جانە يبگ بار پاسيەنتتەردە كورۋدىڭ ناشارلاۋ ءقاۋپىنىڭ تومەندەۋىمەن بايلانىستى بولدى. سونىمەن قاتار، قىسىمنىڭ ەرتە تومەندەۋى قىسقا مەرزىمدە بايقالدى، بۇل اسەردىڭ دەنە سالماعىنىڭ بىرتىندەپ تومەندەۋىنە تاۋەلسىز ەكەنىن كورسەتەدى.
GLP-1ء-دىڭ قابىنۋعا قارسى جانە نەيروپروتەكتورلىق قاسيەتتەرىنە قاراماستان، اۆتورلار الىنعان دەرەكتەردى راستاۋ ءۇشىن ءىرى راندوميزاسيالانعان زەرتتەۋلەر جۇرگىزۋ قاجەتتىگىن اتاپ وتەدى.
ايتا كەتۋ كەرەك، بۇل ماتەريال تەك اقپاراتتىق سيپاتتا جانە ارەكەتكە نۇسقاۋلىق بولىپ تابىلمايدى. «وزەمپيك» جانە «ۆەگوۆي» پرەپاراتتارى — بۇل كەڭ اۋقىمدى قارسى كورسەتىلىمدەرى مەن جاناما اسەرلەرى بار كۇردەلى رەسەپتتىك دارىلەر. بۇل دارىلەردى ماماننىڭ تاعايىنداۋىنسىز قولدانۋ دەنساۋلىعىڭىزعا اۋىر زيان كەلتىرۋى مۇمكىن. كەز كەلگەن ەمدى باستاماس بۇرىن نەمەسە پرەپاراتتاردى قابىلداماس بۇرىن مىندەتتى تۇردە بىلىكتى دارىگەرمەن كەڭەسىڭىز.