سانتياگودا 11 جاسار چيليلىك ءانشى ماكسيمو لەون ءچيليدىڭ ءداستۇرلى ۇلتتىق ءبيى ءارى مۋزىكالىق جانرى سانالاتىن كۋەكانى قازاقستانعا ارناپ ورىندادى. Kazajistán، pueblo valiente («قازاقستان — ايبىندى حالىق») اتتى كومپوزيسيا ديماش قۇدايبەرگەننىڭ چيليدەگى العاشقى كونسەرتى قارساڭىندا شىرقالدى، دەپ حابارلايدى infohub.kz سايتى.
ونەر كورسەتۋ ەل ۇكىمەتىنىڭ رەزيدەنسياسى ورنالاسقان لا-مونەدا سارايىنىڭ الدىندا ءوتتى. جوبانى ماكسيمو لەون مەن «چيلي — قازاقستان» دوستىق قوعامىنىڭ قوس ديرەكتورى كارمەن ساندوۆال دايىنداعان.
كومپوزيسيا ءچيليدىڭ ۇلتتىق مەرەكەلەرى Fiestas Patrias اياسىندا ۇسىنىلدى. سونىمەن قاتار اۆتورلار ونى قازاقستانعا جانە ديماشتىڭ الداعى كونسەرتىنە ارنادى.
كۋەكا چيلي مادەنيەتىندە ەرەكشە ورىن الادى. ونى جۇپ بولىپ مۋزىكا مەن انمەن بيلەيدى، ال ءبيدىڭ ءوزى ەلدىڭ باستى سيمۆولدارىنىڭ ءبىرى سانالادى. كارمەن ساندوۆالدىڭ ايتۋىنشا، جاڭا كومپوزيسيا تولىعىمەن باسقا ەلگە ارنالعان تۇڭعىش كۋەكا بولدى.
«كۋەكانى بيلەيدى، ونى جاقسى كورەدى جانە قۇرمەتتەيدى. ول ءبىزدىڭ تاريحىمىزدى، پوەزيامىزدى، ءداستۇرىمىزدى جانە حالقىمىزدىڭ توزىمدىلىگىن جەتكىزەدى. ءبىزدىڭ كۋەكا — بۇكىل قازاقستان حالقىنا دەگەن قۇشاعىمىز»، — دەدى ول.
كومپوزيسيانىڭ ءماتىنىن كارمەن ساندوۆال جازدى، مۋزىكاسىن مۋنداكا انتيناو اپكەلى-سىڭلىلەرى جاسادى. جوباعا Latin Cover Chile مەن Coliseo Kids تە قاتىستى، ال جازۋمەن RA Estudio ستۋدياسى اينالىستى.
ديماش قۇدايبەرگەن چيليدە 24 قاراشادا العاش رەت ونەر كورسەتەدى. DIMENSIONS تۋرى اياسىنداعى كونسەرت سانتياگوداعى Movistar Arena ساحناسىندا وتەدى.
بۇعان دەيىن «كۋرسيۆ» ديماشتىڭ جانكۇيەرلەرىنىڭ الەم بويىنشا ءارتىس تۋرىنا قالاي دايىندالىپ جاتقانى تۋرالى جازعان.
ديماشتىڭ الدىڭعى الەمدىك كونسەرتتىك تۋرى Stranger ءۇش جىلعا سوزىلدى: 2022 جىلى الماتىدا باستالىپ، 2026 جىلدىڭ قارساڭىندا ريگادا اياقتالدى.