قازاقستان مۇسىلماندارى ءدىني باسقارماسى ايەلدەرگە قاتىستى زورلىق-زومبىلىق وقيعالارىنىڭ جيىلەۋىنە بايلانىستى مالىمدەمە جاسادى. ۇيىم وكىلدەرى مۇنداي فاكتىلەردىڭ جول بەرىلمەيتىنىن جانە قاتاڭ ايىپتالاتىنىن اتاپ ءوتتى، دەپ حابارلايدى infohub.kz.
دىمك-تىڭ Instagram-داعى رەسمي پاراقشاسىندا قازاقستاندىق قوعامدا بولىپ جاتقان كەيبىر وقيعالار تۋرالى ەستۋ اۋىر ەكەندىگى ايتىلعان. اسىرەسە، ايەلدىڭ ءوز وتباسىندا زارداپ شەگىپ، زورلىق-زومبىلىققا ۇشىراۋى قىنجىلتادى.
«ايەل — وتباسى وشاعىنىڭ ساقشىسى. بىرەۋ ءۇشىن ول سۇيىكتى قىز، بىرەۋ ءۇشىن — قىمباتتى انا، بىرەۋ ءۇشىن — سۇيىكتى جار. ول قورعان مەن جىلۋ ىزدەيدى. سوندىقتان ەر ادامنىڭ مىندەتى — وعان قامقور بولۋ. ءبىزدىڭ ارداقتى پايعامبارىمىز مۇحاممەد: «سەندەردىڭ ەڭ جاقسىلارىڭ — وتباسىنا ەڭ جاقسى قارايتىندارىڭ»، — دەگەن. بۇل سوزدەردە تەرەڭ ماعىنا جاتىر. ەر ادامنىڭ كۇشى — جۇدىرىعىندا ەمەس. شىنايى كۇش — جاقىنىنا تىرەك بولۋدا، ونىڭ كوز جاسىنا سەبەپ بولماۋدا»، — دەلىنگەن مالىمدەمەدە.
دىمك-تە اشۋ ۇستىندە كوتەرىلگەن قول مەن وتكىر سوزدەر ادام جۇرەگىندە تەرەڭ ءىز قالدىرۋى مۇمكىن ەكەنىن اتاپ ءوتتى. «وتباسى — ادام ءوزىن بارىنشا ءقاۋىپسىز سەزىنەتىن ورىن بولۋى كەرەك. ايەل ءوز ۇيىندە قورقىنىشسىز ءومىر ءسۇرۋى ءتيىس. قىزىن سۇيىسپەنشىلىكپەن ءوسىرىپ، ۇلكەن ۇمىتپەن جاڭا وتباسىعا شىعارىپ سالعان ءاربىر اكە مەن انا ءبىر عانا نارسەنى تىلەيدى — ونىڭ بارعان جەرىندە باقىتتى بولۋىن. وسى سەنىمدى اقتامايىق. ايەلدى قورعاۋ — ەر ادامنىڭ پارىزى»، — دەپ تۇيىندەدى ۇيىم.
بۇعان دەيىن «كۋرسيۆ» جامبىل وبلىسىنداعى 19 جاستاعى مادينا راشيد قىزىنىڭ قايعىلى قازاسىنا قاتىستى الەۋمەتتىك جەلىلەردەگى رەزونانس باسىلماي تۇرعانىن حابارلاعان. جاقىندارىنىڭ ايتۋىنشا جانە قازنەتتەگى جاريالانىمدارعا سايكەس، قىز تۇرمىستىق جانجالدان كەيىن كۇيەۋىنىڭ قاتىگەز زورلىق-زومبىلىعىنا ۇشىراعان، وعان سەبەپ بولعان — جەلىنگەن بالالار ءتاتتىسى «بارني».