قازاقستاندىق سپورتشى دينارا داۋىل قىزى براتيسلاۆادا ءوتىپ جاتقان جاستار اراسىنداعى الەم چەمپيوناتىندا (U20) قولا مەدال ءۇشىن وتكەن بەلدەسۋدە وزبەكستاندىق ساحيبجامال ەسبوسىنوۆادان 0:12 ەسەبىمەن ۇتىلىپ، جارىستى اياقتادى، دەپ حابارلايدى infohub.kz.
50 كەلىگە دەيىنگى سالماق دارەجەسىندە دينارا العاشقى قارسىلاستارىن سەنىمدى تۇردە ۇتتى: العاشقى بەلدەسۋدە ءازىربايجاندىق ەسرا ءماماداليدى (7:1)، ال 1/8 فينالدا بەلارۋستىك كسەنيا كرىشتوفنيكتى (10:2) جەڭدى. الايدا شيرەك فينالدا قازاقستاندىق سپورتشى ۆەنەسۋەلالىق الەكسا الۆارەستەن 0:11 ەسەبىمەن ءىرى جەڭىلىس تاپتى. دەگەنمەن، ۆەنەسۋەلالىق سپورتشى فينالعا وتكەندىكتەن، داۋىل قىزى جۇبانىش بەلدەسۋلەرى ارقىلى قولا ءۇشىن كۇرەسۋ مۇمكىندىگىنە يە بولدى. بۇل كەزەڭدە ول قىرعىزستاندىق ەلميرا قارابالاەۆانى 14:3 ەسەبىمەن ۇتىپ، ەشقانداي مۇمكىندىك قالدىرمادى.
ەسبوسىنوۆامەن ءۇشىنشى ورىن ءۇشىن وتكەن شەشۋشى بەلدەسۋدە دينارا باسەكەلەستىك كورسەتە الماي، ءىرى ەسەپپەن ۇتىلىپ، جۇلدەسىز قالدى. وسىلايشا، ول 2026 جىلعى جاستار اراسىنداعى ازيا چەمپيوناتىنىڭ قولاسىنا الەم بىرىنشىلىگىنىڭ قولاسىن قوسا المادى.
كۇننىڭ باسقا شەشۋشى بەلدەسۋلەرىنە قازاقستاندىق سپورتشىلار قاتىسپادى. گرەك-ريم كۇرەسىندە الپامىس بولات ۇلى (60 كگ) مەن نۇرداۋلەت راحمان (82 كگ)، سونداي-اق مەدينا قۋانىشبەك (50 كگ) مەن مەيرامگۇل ماقسۇت (72 كگ) جارىستىڭ العاشقى كەزەڭدەرىندە جولدارىن جالعاستىرا المادى.
قازاقستانعا جالعىز مەدال، ءارى ول التىن، كلاسسيكالىق كۇرەس شەبەرى قىزىبەك قالماعامبەتوۆتىڭ ەنشىسىندە — ول 67 كەلىگە دەيىنگى سالماقتا توپ جاردى.
حالىقارالىق كۇرەس فەدەراسياسىنىڭ (UWW) ەگيداسىمەن ءوتىپ جاتقان الەم بىرىنشىلىگى سلوۆاكيا استاناسىندا وتۋدە. وعان الەمنىڭ تۇكپىر-تۇكپىرىنەن 700 جاس سپورتشى قاتىسىپ، كۇرەستىڭ ءۇش تۇرىنەن — گرەك-ريم، ەركىن جانە ايەلدەر كۇرەسىنەن — 120 جۇلدە جيىنتىعىن ساراپقا سالۋدا. قازاقستان اتىنان براتيسلاۆادا 30 سپورتشى — 20 جىگىت پەن 10 قىز — ونەر كورسەتۋدە. تۋرنير 23 تامىزدا اياقتالادى.