Telegram مەسسەندجەرىنىڭ نەگىزىن قالاۋشى پاۆەل دۋروۆ قوسىمشانىڭ App Store دۇكەنىنەن ۋاقىتشا جويىلۋىنا تۇسىنىكتەمە بەرىپ، باسقا ازىرلەۋشىلەردى جاڭا ءقاۋىپ تۋرالى ەسكەرتتى، دەپ حابارلايدى infohub.kz سايتى.
دۋروۆ ءوزىنىڭ Telegram-ارناسىندا بۇل وقيعا جاريا توپتىق چاتقا زاڭسىز پورنوگرافيالىق كونتەنت ورنالاستىرعان ءبىر پايدالانۋشىعا بايلانىستى بولعانىن ءتۇسىندىردى. «Telegram ءارتۇرلى مودەراسيا قۇرالدارىنىڭ كومەگىمەن جاريا توپتارداعى زاڭسىز كونتەنتتى جىلدام جوياتىندىقتان، شابۋىلداۋشى تەحنيكالىق ايلاعا جۇگىنۋگە ءماجبۇر بولدى. ول بەلسەندى توپتىق چاتتاعى ەسكى حابارلامانى وڭدەپ، وعان جاساندى ينتەللەكت كومەگىمەن جاسالعان نەمەسە وزگەرتىلگەن زاڭسىز كونتەنتتى ەنگىزدى»، — دەپ ءتۇسىندىردى دۋروۆ.
مەسسەندجەر نەگىزىن قالاۋشىنىڭ ايتۋىنشا، كونتەنت توپ مۇشەلەرىنەن ءىس جۇزىندە جاسىرىلعان، ولار ونى كورە الماعان جانە ۋاقىتىندا شاعىمدانا الماعان. «شابۋىلداۋشى بلوكتاۋعا ماماندانعان قاراقشى بولىپ شىقتى: مۇنداي ادامدار توپ يەلەرىنەن اقشا تالاپ ەتەدى، ولاردىڭ قاۋىمداستىقتارىنا شابۋىل جاساماۋعا ۋادە بەرەدى. ولار جاريا توپتارعا زاڭسىز كونتەنت ورنالاستىرۋ ءۇشىن اۆتوماتتاندىرىلعان اككاۋنتتاردى پايدالانادى، سودان كەيىن تولەم جاساۋدان باس تارتقان زاڭدى قاۋىمداستىقتاردى جويۋعا تىرىسىپ، بۇل تۋرالى تىكەلەي Apple-گە شاعىمدانادى»، — دەدى دۋروۆ.
كاسىپكەر Telegram-نىڭ جاريا توپتارىنداعى زاڭسىز پورنوگرافيالىق كونتەنت جۇيەلىك ماسەلە ەمەس ەكەنىن اتاپ ءوتتى — مودەراسيا ءتيىمدى جۇمىس ىستەيدى. دۋروۆتىڭ پىكىرىنشە، قالىپتاسقان جاعدايدان قوسىمشالار مەن ونلاين-قاۋىمداستىقتاردى ازىرلەۋشىلەر ءۇشىن ەكى ماڭىزدى قورىتىندى جاساۋعا بولادى.
«قاراقشىلار Appleء-دى شامادان تىس ارەكەت ەتۋگە ماجبۇرلەۋدىڭ جولىن تاپتى. Apple بىزبەن الدىن الا بايلانىسپاي-اق Telegram-دى App Store-دان جويدى. بۇل پايدالانۋشى كونتەنتى بار كەز كەلگەن ءموبيلدى قوسىمشا ءۇشىن الەۋەتتى جۇيەلىك ءقاۋىپ تۋدىرادى. ەگەر ميللياردتان استام ادام پايدالاناتىن قوسىمشانى الدىن الا ەسكەرتۋسىز App Store-دان جويۋعا بولاتىن بولسا، وندا بۇل كەز كەلگەن قوسىمشامەن بولۋى مۇمكىن»، — دەپ جازدى ول.
سونىمەن قاتار، دۋروۆ قاۋىمداستىقتاردى بلوكتاۋ ءۇشىن شاعىمداردى پايدالاناتىن قاراقشىلاردىڭ تاكتيكاسى بارعان سايىن كۇردەلەنىپ، ءارتۇرلى الەۋمەتتىك پلاتفورمالارداعى قاۋىمداستىقتارعا ءقاۋىپ توندىرەتىنىن اتاپ ءوتتى. ول باسقا ازىرلەۋشىلەردى ساق بولۋعا شاقىردى.
الدىڭعى كۇنى Appleء-دىڭ تىيىم سالىنعان ماتەريالدارعا بايلانىستى Telegram-دى App Store-دان قىسقا ۋاقىتقا جويعانى بەلگىلى بولدى. انىقتالعانداي، مودەراتورلار پلاتفورمانىڭ بالالارعا قاتىستى سەكسۋالدىق زورلىق-زومبىلىق ماتەريالدارىنا تىيىم سالۋ ەرەجەلەرىن بۇزاتىن كونتەنتتى تاپقان.