كونگونىڭ بۋنيا قالاسىنداعى مەديسينا قىزمەتكەرلەرى بەيسەنبى كۇنى جالاقىلارىن تالاپ ەتىپ نارازىلىق اكسياسىن وتكىزدى. ولار بىرنەشە مەديسينالىق مەكەمەنى تاستاپ كەتتى. بۇل تۋرالى infohub.kz حابارلايدى.
نارازىلىق بىلدىرۋشىلەر يتۋري پروۆينسياسىنىڭ اكىمشىلىگى الدىنا جينالدى. ايتا كەتەيىك، بۇل پروۆينسيادا ەلدەگى ەبولا ىندەتىنىڭ 90 پايىزعا جۋىعى تىركەلگەن. ولار جالاقى ماسەلەسىنە بايلانىستى بىرنەشە اپتا بۇرىن باستالعان نارازىلىقتارعا قوسىلعان سوڭعى توپ بولىپ وتىر.
ەبولا ىندەتىنە شالدىققان ناۋقاستارعا كۇتىم جاسايتىن مەدبيكەلەردى قوسا العاندا، مەديسينا قىزمەتكەرلەرى ىندەت مامىر ايىنىڭ ورتاسىندا جاريالانعاننان بەرى جالاقى مەن ۇستەمەاقى الماعاندارىن ايتتى. نارازىلىق بىلدىرۋشىلەردىڭ ءبىرى ەدۋيج ماكوسي: «ءىستى وسىلاي باسقارسا، بۇل پروۆينسيادا ەبولا ىندەتى ەشقاشان اياقتالمايدى. ءبىز بيلىكتەن بارلىق دەڭگەيدە ارالاسىپ، تەز ارادا شەشىم تابۋدى سۇرايمىز»، — دەدى.
بۇعان دەيىن شەنەۋنىكتەر تولەمنىڭ كەشىگۋىن لوگيستيكالىق ماسەلەلەرمەن تۇسىندىرگەن بولاتىن. كونگو بيلىگى بەيسەنبى كۇنى تالاپتارعا بىردەن جاۋاپ بەرمەدى. الدىڭعى قاتارداعى قىزمەتكەرلەردىڭ الەۋمەتتىك جاعدايىنىڭ ناشارلىعى ىندەت كەزىندەگى باستى ماسەلەلەردىڭ ءبىرى بولىپ وتىر. بۇل — تاريحتاعى ەكىنشى ءىرى ىندەت، ول كونگونىڭ ەڭ شالعاي جانە وسال ايماقتارىنىڭ بىرىندە ءورشىپ تۇر. تولەم ماسەلەسىنەن بولەك، كوپتەگەن مەديسينا قىزمەتكەرلەرى مەن مەكەمەلەر ب ۇلىكشىلەر مەن اشۋلى توبىردىڭ شابۋىلىنا ۇشىرادى.
دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادحانوم گەبرەيەسۋس سارسەنبى كۇنى كونگوعا ساپارى كەزىندە بيلىكتى ىندەتپەن كۇرەسۋشىلەرگە كۇتىم مەن قولداۋ كورسەتۋگە باسىمدىق بەرۋگە شاقىردى. «دارىگەرلەر شەكاراسىز» قايىرىمدىلىق ۇيىمى بۇل اپتادا ىندەتتىڭ «ءالى دە الاڭداتارلىق جانە بۇرىن-سوڭدى بولماعان قارقىنمەن تارالىپ جاتقانىن» جانە قابىلدانىپ جاتقان شارالارعا قاراماستان، «جۇقتىرۋ تىزبەگىن ءۇزۋ ءۇشىن قاۋىمداستىقتارعا جەتكىلىكتى جىلدام جەتپەي جاتقانىن» مالىمدەدى.