InfoHub Logo

4 ماۋسىم — قازاقستان رەسپۋبليكاسىنىڭ مەملەكەتتىك رامىزدەر كۇنى. 

مەملەكەتتىك رامىزدەردىڭ تاريحى

مەملەكەتتىك تۋ، ەلتاڭبا جانە ءانۇران — مەملەكەتتىڭ نەگىزگى رامىزدەرى. 1992 جىلى سۋرەتشى شاكەن نيازبەكوۆ سالعان مەملەكەتتىك تۋ بەكىتىلدى. ەگەمەن قازاقستاننىڭ بۇگىنگى ەلتاڭباسى ەكى تانىمال ساۋلەتشى — جانداربەك مالىبەكوۆ پەن شوتا ءۋاليحانوۆتىڭ ەڭبەگىنىڭ جەمىسى.

1992 جىلى رەسپۋبليكامىزدا ءانۇراننىڭ ءانى مەن ماتىنىنە كونكۋرس جاريالاندى. ناتيجەسىندە تۇڭعىش قازاقستان ءانۇرانىنىڭ اۆتورلارى — مۇقان تولەبايەۆ، ەۆگەنيي برۋسيلوۆسكيي مەن لاتيف ءحاميديدىڭ جازعان نۇسقاسى قابىلداندى. بۇدان كەيىن 2006 جىلى جاڭا مەملەكەتتىك ءانۇران قابىلداندى — حالىق اراسىندا كەڭ تانىلعان پاتريوتتىق ءان «مەنىڭ قازاقستانىم» جاڭا ءانۇران نەگىزىنە اينالدى. قازاقستان رەسپۋبليكاسى جاڭا مەملەكەتتىك ءانۇرانىنىڭ اۆتورلارى — ءشامشى قالداياقوۆ، جۇمەكەن ناجىمەدەنوۆ، نۇرسۇلتان نازاربايەۆ.

قازاقستان رەسپۋبليكاسىنىڭ مەملەكەتتىك تۋى

قازاقستان رەسپۋبليكاسىنىڭ مەملەكەتتىك تۋى — ورتاسىندا شۇعىلالى كۇن، ونىڭ استىندا قالىقتاپ ۇشقان قىران بەينەلەنگەن تىك بۇرىشتى كوگىلدىر ءتۇستى ماتا. تۋدىڭ سابىنىڭ تۇسىندا تىك جولاق تۇرىندە ۇلتتىق ورنەك ناقىشتالعان. كۇن، ونىڭ شۇعىلاسى، قىران جانە ۇلتتىق ورنەك بەينەسى التىن تۇستەس. تۋدىڭ ەنى مەن ۇزىندىعىنىڭ اراقاتىناسى — 1:2.

• كوك ءتۇس اشىق اسپاندى، بەيبىتشىلىكتى، يگىلىكتى بىلدىرەدى.
• كۇن بەينەسى ەلىمىزدىڭ جالپىادامزاتتىق قۇندىلىقتاردى قاستەرلەيتىنىن دالەلدەيدى.
• قىران بەينەسى مەملەكەتتىڭ قۋات-كۇشىن، ەگەمەندىگىن جانە تاۋەلسىزدىگىن تانىتادى.
• ۇلتتىق ورنەكتەر حالىقتىڭ مادەنيەتى مەن ءداستۇرىن سيمۆولدىق تۇرعىدا بەينەلەيدى.

قازاقستان رەسپۋبليكاسىنىڭ مەملەكەتتىك ەلتاڭباسى

قازاقستان رەسپۋبليكاسىنىڭ مەملەكەتتىك ەلتاڭباسى — دوڭگەلەك نىساندى جانە كوگىلدىر ءتۇس اياسىنداعى شاڭىراق بەينەسىندە بەينەلەنگەن. شاڭىراقتى اينالا كۇن ساۋلەسىندەي تاراپ ۋىقتار شانشىلعان. شاڭىراقتىڭ وڭ جاعى مەن سول جاعىندا اڭىزدارداعى قاناتتى پىراقتار بەينەسى ورنالاستىرىلعان. جوعارعى بولىگىندە — بەس بۇرىشتى كولەمدى جۇلدىز، ال تومەنگى بولىگىندە «Qazaqstan» دەگەن جازۋ بار. جۇلدىزدىڭ، شاڭىراقتىڭ، ۋىقتاردىڭ، قاناتتى پىراقتاردىڭ بەينەسى، سونداي-اق «Qazaqstan» دەگەن جازۋ — التىن تۇستەس.

• التىن ءتۇس بايلىقتىڭ، ادىلدىكتىڭ جانە كەڭپەيىلدىلىكتىڭ سيمۆولى.
• كوگىلدىر ءتۇس اشىق اسپان، بەيبىتشىلىك جانە باقۋات تىرشىلىك ۇعىمدارىن بىلدىرەدى.

قازاقستان رەسپۋبليكاسىنىڭ مەملەكەتتىك ءانۇرانى

ءانۇران — مەملەكەتتىڭ باستى رامىزدەرىنىڭ ءبىرى. گرەكتىڭ «gimneo» سوزىنەن شىققان «گيمن» تەرمينى «سالتاناتتى ءان» دەگەن ماعىنانى بىلدىرەدى. ءانۇران ەل ازاماتتارىن ءتيىمدى الەۋمەتتىك-ساياسي تۇرعىدان توپتاستىرىپ، ەتنومادەني تۇرعىدان تەڭدەستىرۋ ءۇشىن نەگىزگى مانگە يە، ماڭىزدى دىبىستىق ءرامىز سانالادى.

قازاقستان رەسپۋبليكاسىنىڭ مەملەكەتتىك ءانۇرانى ەكى رەت قابىلداندى (1992 جانە 2006 جىلدارى). 2006 جىلى بەكىتىلگەن جاڭا مەملەكەتتىك ءانۇراننىڭ اۋەنىن جازعان ءشامشى قالداياقوۆ، ءسوزىن جازعان جۇمەكەن ناجىمەدەنوۆ پەن نۇرسۇلتان نازاربايەۆ. بۇل ءاننىڭ تاريحى 1956 جىلدان باستالادى جانە تىڭ يگەرۋ جىلدارىندا جازىلعان.

مەملەكەتتىك رامىزدەردىڭ قولدانىلۋى جانە قورعالۋى

مەملەكەتتىك تۋ مەن ەلتاڭبانىڭ ەتالوندارى قازاقستان رەسپۋبليكاسى پرەزيدەنتىنىڭ رەزيدەنسياسىندا ساقتالادى. مەملەكەتتىك رامىزدەر زاڭمەن قورعالعان، سوندىقتان ولاردى ەشكىمنىڭ قورلاۋىنا جول بەرىلمەيدى. زاڭعا سايكەس، مەملەكەتتىك رامىزدەردى قورلاعاندار — 1 مىڭ اەك-تەن 2 مىڭ اەك-كە دەيىنگى مولشەردە ايىپپۇل سالۋعا نەمەسە ءبىر جىلعا دەيiنگi مەرزiمگە باس بوستاندىعىن شەكتەۋگە نە ناق سول مەرزiمگە باس بوستاندىعىنان ايىرىلادى.

2020 جىلدىڭ قازان ايىندا ەل پرەزيدەنتى قاسىم-جومارت توقايەۆ مەملەكەتتىك رامىزدەردى پايدالانۋ تۋرالى زاڭنامانى قايتا قاراۋ قاجەتتىگىن مالىمدەگەن. وسىدان كەيىن تۋدى بالكونعا ىلۋگە رەسمي رۇقسات بەرىلدى.

مەملەكەتتىك رامىزدەردىڭ سيمۆوليكالىق ماڭىزى

مەملەكەتتىك رامىزدەرىمىز الەمدىك ارەنادا قازاقستاننىڭ سيمۆولىنا اينالدى. تۋىمىز بىرىككەن ۇلتتار ۇيىمىنىڭ عيماراتى الدىندا تۇر، شەتەلدەردەگى ەلشىلىكتەرىمىزدىڭ ماڭدايشالارىنا تىگىلگەن. عارىشكەر تالعات مۇسابايەۆ عارىشتا مەملەكەتتىك تۋدى كوتەردى. ەلىمىزدىڭ وليمپيادا جەڭىمپازدارى انۇرانىمىزبەن بىرگە كوك تۋىمىزدى بيىككە كوتەردى.

قىزىقتى دەرەكتەر

• 1992 جىلدىڭ باسىندا جوعارعى كەڭەس پرەزيديۋمىنىڭ جاڭا مەملەكەتتىك سيمۆوليكانى دايىنداۋ بويىنشا جۇمىس توبىن قۇرۋ تۋرالى قاۋلىسى شىقتى. سوعان سايكەس ارنايى شىعارماشىلىق كوميسسيا قۇرىلدى.
• ەلتاڭبا، تۋ، ءانۇران جوبالارىن جاساۋعا بايقاۋ جاريالانىپ، وعان 600-دەن استام ادام قاتىستى.
• تالعات مۇسابايەۆتىڭ عارىشقا ۇشقانىنا 28 جىل تولدى.
• 2011 جىلى الپينيستەر ماقسۇت جۇمايەۆ پەن ۆاسيليي ليەۆسوۆ قازاقستاننىڭ تۋىن ازيانىڭ ەڭ كۇردەلى تاۋ شىڭى — بيىكتىگى 8 611 مەتر «قاراقورىم چوگوريگە» تىكتى.

مەملەكەتتىك رامىزدەرىمىزدى قادىرلەۋ جانە ولاردىڭ ماڭىزىن ءتۇسىنۋ — ءاربىر قازاقستاندىقتىڭ بورىشى. قازاقستاننىڭ مەملەكەتتىك رامىزدەرى تەك ەلىمىزدىڭ سيمۆولى عانا ەمەس، سونىمەن بىرگە حالقىمىزدىڭ ماقتانىشى، بىرلىگىنىڭ جانە تاۋەلسىزدىگىنىڭ كورىنىسى بولىپ تابىلادى.