الەۋمەتتىك ساۋالناماعا سايكەس، قازاقستاندىقتاردىڭ باسىم بولىگى «زاڭ جانە ءتارتىپ» قاعيداتىن قولداپ، پرەزيدەنتتىڭ «تازا قازاقستان» باستاماسىن باسىم باعىت دەپ ەسەپتەيدى. بۇل تۋرالى infohub.kz حابارلايدى.
قازاقستاندىق قوعامدىق دامۋ ينستيتۋتىنىڭ 2026 جىلدىڭ II توقسانىندا ەلىمىزدىڭ بارلىق وڭىرلەرىنەن 2،4 مىڭ رەسپوندەنت اراسىندا جۇرگىزگەن زەرتتەۋ ناتيجەسى كورسەتكەندەي، ساۋالناماعا قاتىسقانداردىڭ 87،3% «زاڭ جانە ءتارتىپ» قاعيداتىنىڭ ىسكە اسىرىلىپ جاتقانىن بىلەدى. سونىمەن قاتار حاباردارلىق دەڭگەيى قالادا دا، اۋىلدىق جەرلەردە دە جوعارى بولىپ وتىر، وندا تۇرعىنداردىڭ 85،1% بۇل تۋرالى حاباردار.
جاس ەرەكشەلىگىنە قاراماستان، قازاقستاندىقتار زاڭدى ساقتاۋدىڭ ماڭىزدىلىعىن بىردەي جوعارى باعالايدى، بۇل قوعامدا ادىلدىك، جاۋاپكەرشىلىك جانە قۇقىق ۇستەمدىگىنە دەگەن سۇرانىستىڭ قالىپتاسقانىن كورسەتەدى.
ساۋالناماعا قاتىسقانداردىڭ كوپشىلىگى زاڭ مەن ءتارتىپتى ساقتاۋ – تەك مەملەكەتتىڭ عانا ەمەس، ازاماتتاردىڭ دا مىندەتى دەپ سانايدى. اتاپ ايتقاندا، 43،6% رەسپوندەنت جاۋاپكەرشىلىك مەملەكەت پەن قوعامعا بىردەي جۇكتەلگەن دەپ ەسەپتەسە، تاعى 30،6% ول ەڭ الدىمەن ءاربىر قازاقستاندىققا جۇكتەلگەن دەپ سانايدى. وسىلايشا، ساۋالناماعا قاتىسقانداردىڭ 74،2% زاڭدى ساقتاۋدى ازاماتتاردىڭ جەكە جاۋاپكەرشىلىگىمەن تولىق نەمەسە مەملەكەتپەن بىرلەسىپ بايلانىستىرادى. بۇل ۇستانىم جاستار اراسىندا ايقىن كورىنەدى: 18 بەن 28 جاس ارالىعىنداعى قازاقستاندىقتاردىڭ جارتىسىنان استامى (52،8%) زاڭ مەن ءتارتىپتى ساقتاۋ ءۇشىن ەڭ الدىمەن ءاربىر ازامات جاۋاپتى دەپ سانايدى.
زەرتتەۋگە قاتىسقانداردىڭ 67،1% پرەزيدەنتتىڭ «تازا قازاقستان» تۇجىرىمداماسىن باسىم باعىتتاردىڭ ءبىرى دەپ اتادى. بۇل باستاما ءارتۇرلى جاس جانە كاسىبي توپتار – ستۋدەنتتەر، ورتا جاستاعى ادامدار، جەكە كاسىپكەرلەر جانە جوعارى ءبىلىمدى رەسپوندەنتتەر اراسىندا قولداۋعا يە. ساۋالناما سونداي-اق الەۋمەتتىك ينفراقۇرىلىمنىڭ جاي-كۇيىنە قاناعاتتانۋشىلىقتىڭ ارتقانىن كورسەتتى. ەڭ جوعارى باعانى مەكتەپتەردىڭ قولجەتىمدىلىگى (78،9%)، مادەنيەت مەكەمەلەرى (73،8%)، بالاباقشالار (73،5%)، سپورت كەشەندەرى (72،3%) جانە دەمالىس پەن سەرۋەندەۋ ورىندارى (73،7%) الدى. مەملەكەتتىك ينستيتۋتتاردىڭ جۇمىسىن بالالى وتباسىلار، كوپبالالى وتباسىلار، 28 جاسقا دەيىنگى جاستار جانە بيۋدجەتتىك سالا قىزمەتكەرلەرى جوعارى باعالايدى.
مەملەكەت باسشىسى جاريالاعان سيفرلاندىرۋ جانە جاساندى ينتەللەكت جىلىنىڭ ماڭىزدىلىعىن رەسپوندەنتتەردىڭ 66% اتاپ ءوتتى. بۇل باستاما 18–28 جاس ارالىعىنداعى جاستار (65،2%) مەن 29–45 جاس ارالىعىنداعى ازاماتتار (68،6%) اراسىندا كوبىرەك قولداۋ تاپتى. سونىمەن قاتار ساۋالناماعا قاتىسقانداردىڭ 60،7% جالپى العاندا ەلىمىزدىڭ دامۋىنىڭ نەگىزگى سالالارىنا جاساندى ينتەللەكت تەحنولوگيالارىن بەلسەندى ەنگىزۋدى جاقتايدى.
زەرتتەۋ اۆتورلارىنىڭ پىكىرىنشە، ساۋالناما ناتيجەلەرى قوعامدا ءومىر ساپاسىن ارتتىرۋ، تەحنولوگيالاردى دامىتۋ، مەملەكەتتىك باسقارۋدى جەتىلدىرۋ، ءبىلىم جانە ەكولوگيالىق مادەنيەتكە قاتىستى باستامالار ەڭ كوپ قولداۋعا يە ەكەنىن كورسەتەدى.