قازاقستان پرەمەر-مينيسترى ولجاس بەكتەنوۆ كۋرچاتوۆ قالاسىندا قۋاتى 700 مۆت ەلەكتر ستانسياسىن سالۋ جونىندەگى ينۆەستيسيالىق كەلىسىمدى بەكىتەتىن قاۋلىعا قول قويدى. جوبانىڭ جالپى قۇنى 881 ملرد تەڭگەنى قۇرايدى، دەپ حابارلايدى infohub.kz سايتى.
كەلىسىم قازاقستان رەسپۋبليكاسى ەنەرگەتيكا مينيسترلىگى مەن «گرەس كۋرچاتوۆ» ج ش س اراسىندا جاسالدى. جاڭا كوندەنساسيالىق ەلەكتر ستانسياسى اباي وبلىسىنىڭ كۋرچاتوۆ قالاسىندا ورنالاسادى.
قۇجاتقا سايكەس، ءارقايسىسىنىڭ قۋاتى 350 مۆت بولاتىن ەكى ەنەرگوبلوكتى 2032 جىلعا دەيىن كەزەڭ-كەزەڭمەن ىسكە قوسۋ جوسپارلانۋدا. ستانسيا ىسكە قوسىلعاننان كەيىن جىلىنا 5 ملرد كۆت/ساع-قا دەيىن ەلەكتر ەنەرگياسىن وندىرە الادى. جوبا شامامەن 4،4 مىڭ جۇمىس ورنىن قۇرۋدى كوزدەيدى.
«ستانسيا جوعارى قىسىم مەن تەمپەراتۋرا پارامەترلەرىندە جۇمىس ىستەۋگە ەسەپتەلگەن زاماناۋي بۋ-كۇش جابدىعىمەن جابدىقتالادى، "تازا كومىر" تەحنولوگيالارى قولدانىلادى»، — دەلىنگەن ۇكىمەت مالىمدەمەسىندە.
قورشاعان ورتاعا اسەردى ازايتۋ ءۇشىن جوباعا ەكولوگيالىق كودەكسكە جانە قولجەتىمدى ۇزدىك تەحنيكالار تالاپتارىنا سايكەس گاز تازارتۋ، شىعارىندىلاردى ءسۇزۋ جانە شاڭدى باسۋ جۇيەلەرى كىرەدى.