بىرنەشە جىل قاتارىنان قارقىندى وسكەن قىتايدىڭ ەلەكتروموبيل نارىعى باسەڭدەي باستادى: 2026 جىلدىڭ العاشقى جەتى ايىندا باتارەيالىق كولىكتەردىڭ ساتىلىمى وتكەن جىلدىڭ سايكەس كەزەڭىمەن سالىستىرعاندا 14%-عا تومەندەدى، دەپ حابارلايدى infohub.kz سايتى.
قىتايدىڭ جەڭىل كولىكتەر قاۋىمداستىعىنىڭ (CPCA) دەرەكتەرى بويىنشا، جىل باسىنان بەرى قىتايدا شامامەن 4،7 ملن ەلەكتروموبيل ساتىلعان. سۇرانىستىڭ تومەندەۋىنە ءىرى وندىرۋشىلەر دە تاپ بولدى. شىلدەدە BYD ىشكى نارىقتا 239،3 مىڭ كولىك ساتتى — بۇل بىلتىرعىمەن سالىستىرعاندا 9%-عا از، الايدا ماۋسىممەن سالىستىرعاندا ساتىلىم 4،9%-عا وسكەن. Geely-دە جاعداي ۇقساس: ماۋسىممەن سالىستىرعاندا ساتىلىم 4%-عا ءوستى، ءبىراق جىلدىق كورسەتكىشتە 29،1%-عا تومەندەدى. بۇل قۇلدىراۋ Xpeng، Nio جانە Li Auto-عا دا اسەر ەتتى.
سەبەپتەردىڭ ءبىرى — مەملەكەتتىك سۋبسيديالاردىڭ قىسقارۋى. بۇرىن جاڭا كولىك ساتىپ الۋشىلار 15 مىڭ يۋان كولەمىندە تولەم الا الاتىن. ەندى وتەماقى كولىك قۇنىنىڭ 10%-ىن قۇرايدى، ءبىراق 10 مىڭ يۋاننان (شامامەن 1 ملن تەڭگە) اسپايدى. ەڭ قولجەتىمدى ەلەكتروموبيلدەر ءۇشىن بۇل قولداۋدىڭ شامامەن 5 مىڭ يۋانعا ازايۋىن بىلدىرەدى. ەكونوميكانىڭ باياۋلاۋى مەن اۆتوكولىك وندىرۋشىلەر اراسىنداعى باعا سوعىسى قوسىمشا قىسىم جاساۋدا. ەكىنشى توقساندا قىتايدىڭ ءجىو 4،3%-عا ءوستى — بۇل 2022 جىلدىڭ سوڭىنان بەرگى ەڭ تومەنگى كورسەتكىش.
قازاقستانداعى كولىك باعاسىنا اسەرى تۋرالى ايتۋ ءالى ەرتە. سونىمەن قاتار، Carscoops اتاپ وتكەندەي، ءدال ءقازىر ەكسپورت BYD مەن Geely-گە وتاندىق نارىقتاعى ساتىلىمنىڭ تومەندەۋىن وتەۋگە كومەكتەسۋدە. ەگەر بۇل ءۇردىس جالعاسا، شەتەلدىك نارىقتار قىتايلىق وندىرۋشىلەر ءۇشىن ودان دا ماڭىزدى بولا تۇسەدى. بولاشاقتا بۇل قازاقستانداعى كولىك باعاسى مەن قولجەتىمدىلىگىنە اسەر ەتۋى مۇمكىن. جۇڭگو برەندتەرىنىڭ جەرگىلىكتى نارىقتاعى ۇلەسى ارتىپ كەلە جاتقاندىقتان، جاعدايدىڭ دامۋىن قاداعالاۋ ماڭىزدى.