قازاقستاندا ەلەكترۆەلوسيپەدتەر قۋاتىنا قاراماستان موپەدكە تەڭەستىرىلدى. دەمەك، ولارمەن تروتۋارمەن ءجۇرۋ — زاڭ بۇزۋشىلىق. بۇل تۋرالى ۇكىمەتتەگى بريفينگتە ىشكى ىستەر ۆيسە-مينيسترى يگور لەپەحا مالىمدەدى، دەپ حابارلايدى NUR.KZ ءتىلشىسى، infohub.kz سايتىنا سىلتەمە جاساپ.
جۋرناليستەر وسى كولىك ءتۇرى اسىرەسە جاسوسپىرىمدەر مەن بالالار اراسىندا كەڭ تاراعانىنا نازار اۋدارىپ، مۇنداي قۇرىلعىلاردىڭ جىلدامدىعى ساعاتىنا 30 كيلومەترگە جەتەتىنىن ەسكەرىپ، ولاردىڭ تروتۋارمەن ءجۇرۋى قانشالىقتى زاڭدى ەكەنىن سۇرادى.
«ءبىز بۇل ماسەلەنى رەتتەپ قويدىق. ەلەكترۆەلوسيپەدتەر قۋاتىنا قاراماستان موپەدكە تەڭەستىرىلدى، ياعني ءقازىر ەلەكترۆەلوسيپەدپەن تروتۋارمەن جۇرۋگە بولمايدى، بۇل — زاڭ بۇزۋشىلىق. بۇل نورما زاڭ جۇزىندە بەكىتىلگەن. ءبىز ولاردى دا موپەد يەلەرى سياقتى جاۋاپكەرشىلىككە تارتامىز»، — دەدى يگور لەپەحا.
ەسكە سالايىق، 1 شىلدەدەن باستاپ قازاقستاندا ەلەكترساموكاتتارمەن ءجۇرۋدىڭ جاڭا ەرەجەلەرى كۇشىنە ەندى. جاس شەكتەۋى، كۋالىك پەن ساقتاندىرۋ تالاپتارى ەنگىزىلدى.
الايدا سول كەزدە ىشكى ىستەر مينيسترلىگى ەلەكترساموكات جۇرگىزۋشىلەرىنە تاعى ءبىر قاتاڭدىقتى — 25 تامىزدان باستاپ تروتۋارلار مەن جاياۋ جۇرگىنشى جولدارىمەن جۇرۋگە تىيىم سالىناتىنىن جاريالاعان بولاتىن.
بۇرىن تروتۋارمەن ساعاتىنا 6 كيلومەتردەن اسپايتىن جىلدامدىقپەن جۇرۋگە رۇقسات ەتىلسە، ەندى ەلەكترساموكاتتارمەن تەك ۆەلوسيپەد جولدارىمەن نەمەسە ۆەلوسيپەد جولاقتارىمەن، ال ولار بولماعان جاعدايدا ءجۇرىس بولىگىنىڭ وڭ شەتىمەن، جول جيەگىمەن جۇرۋگە بولادى.