الەمدەگى ەڭ ۇلكەن تولىق ەلەكترلىك ۇشاق سىناق ۇشۋىن ءساتتى اياقتاپ، تاڭعالارلىق ۇنەمدىلىگىن كورسەتتى: 27 مينۋت اۋەدە بولۋ نەبارى 5 دوللار تۇراتىن ەلەكتر ەنەرگياسىن قاجەت ەتتى، دەپ حابارلايدى infohub.kz سايتى.
Heart Aerospace كومپانياسى ءوزىنىڭ تولىق كولەمدى X1 ەلەكترۇشاعىنىڭ سىناعىن وتكىزدى. سالماعى 11 توننادان اساتىن اۋە كەمەسى نيۋ-يورك شتاتىنىڭ سولتۇستىگىندەگى پلاتتسبۋرگ حالىقارالىق اۋەجايىنان كوككە كوتەرىلىپ، شامامەن 335 مەتر بيىكتىككە جەتتى. قاناتتارىنىڭ ۇزىندىعى 32 مەتردەن اساتىن X1 ازىرگە ۇشقان ەڭ ۇلكەن ەلەكترۇشاق اتاندى.
مودەل بورتىنداعى اككۋمۋلياتورلاردان قۋات الاتىن ءتورت ەلەكتر قوزعالتقىشىمەن جابدىقتالعان. ۇشۋ كەزىندە ۇشاق ءبىر مەگاۆاتتتان استام ەنەرگيا جۇمسادى. بۇل پروتوتيپ ايماقتىق اۋە تاسىمالىنا ارنالعان 30 ورىندىق ES-30 گيبريدتى جولاۋشى ۇشاعىن جاساۋعا نەگىز بولادى.
كومپانيا نەگىزىن قالاۋشى اندەرس فورسلۋندتىڭ ايتۋىنشا، ءساتتى ۇشۋ ەلەكتر تارتىمىنىڭ كوممەرسيالىق اۆياسيادا قولدانىلۋىنىڭ ناقتى ەكەنىن دالەلدەيدى. ES-30 مودەلىن پايدالانۋ 2031 جىلعا جوسپارلانعان. مۇنداي تەحنولوگيالاردى ەنگىزۋ اۋە كومپانيالارىنىڭ وپەراسيالىق شىعىندارىن 40 پايىزدان استامعا ازايتىپ، ايماقتىق رەيستەردى قولجەتىمدى ەتەدى.