2026 جىلدىڭ تامىزىندا قازاقستاندا ەڭبەك كودەكسىنە ەنگىزىلگەن وزگەرىستەر كەزەڭ-كەزەڭىمەن كۇشىنە ەنەدى. تۇزەتۋلەر 4 تامىزدا قولدانىلا باستادى، كەلەسى پاكەت 13 تامىزدا، ال سوڭعىسى 25 تامىزدا كۇشىنە ەنەدى، دەپ حابارلايدى infohub.kz سايتى.
وزگەرىستەر ەڭبەك شارتتارىنا، تارتىپتىك جاۋاپكەرشىلىككە، مەديسينالىق تەكسەرۋلەرگە، ەڭبەكتى قورعاۋعا، كادرلىق پروسەستەردى سيفرلاندىرۋعا، سىبايلاس جەمقورلىققا قارسى شەكتەۋلەرگە جانە كيبەرقاۋىپسىزدىككە قاتىستى.
4 تامىزدان باستاپ تۇزەتۋلەردىڭ نەگىزگى پاكەتى كۇشىنە ەندى. ەڭبەك زاڭناماسىنىڭ نەگىزگى قاعيداتتارىنا قىزمەتكەردىڭ ار-نامىسى مەن قادىر-قاسيەتىن قۇرمەتتەۋ قۇقىعى ەنگىزىلدى، سونداي-اق جەكە ومىرگە قول سۇعىلماۋشىلىق قۇقىعى بەكىتىلدى.
ەگەر ۇمىتكەر جۇمىسقا ورنالاسۋ كەزىندە كەپىلدىكتەرى بار ازاماتتار ساناتىنا جاتسا، جۇمىس بەرۋشى ونىڭ تالابى بويىنشا جۇمىسقا قابىلداۋدان باس تارتۋ سەبەبىن جازباشا تۇردە تۇسىندىرۋگە مىندەتتى.
مەرزىمدى ەڭبەك شارتىن توقتاتۋ ءتارتىبى وزگەردى. ەگەر سوڭعى جۇمىس كۇنى ۋاقىتشا ەڭبەككە جارامسىزدىق نەمەسە الەۋمەتتىك دەمالىس كەزەڭىنە سايكەس كەلسە، جۇمىستان بوساتىلعان كۇن اۋرۋ پاراعى نەمەسە دەمالىس اياقتالعاننان كەيىنگى العاشقى جۇمىس كۇنى بولىپ ەسەپتەلەدى.
سونداي-اق، ماتەريالدىق جاۋاپتى قىزمەتكەرلەردى جۇمىستان بوساتۋ ەرەجەلەرى ناقتىلاندى. ەگەر م ۇلىكتى نەمەسە قۇجاتتاردى بەرۋ قىزمەتكەردىڭ كىناسىنەن اياقتالماسا، ەڭبەك شارتى قابىلداۋ-تاپسىرۋ ءراسىمى اياقتالعاننان كەيىن توقتاتىلادى.
تارتىپتىك جازا قولدانۋ كەزىندە جۇمىس بەرۋشىلەر ەندى تەرىس قىلىقتىڭ اۋىرلىعىن عانا ەمەس، ونى جاساۋ ءمان-جايلارىن، سونداي-اق قىزمەتكەردىڭ وكىنۋ دارەجەسىن دە ەسكەرۋى ءتيىس.
سونىمەن قاتار، مىندەتتى مەديسينالىق تەكسەرۋدەن وتەتىن قىزمەتكەرلەردىڭ جۇمىس ورنى مەن ورتاشا جالاقىسى ساقتالادى. جۇمىس بەرۋشىلەرگە ەڭبەك قاۋىپسىزدىگى تالاپتارىنا سايكەس نەگىزگى قورلاردى ۇستاۋ مىندەتى دە جۇكتەلدى.
13 تامىزدان باستاپ سىبايلاس جەمقورلىققا قارسى ءىس-قيمىل جانە كادرلىق پروسەستەردى سيفرلاندىرۋعا بايلانىستى نورمالار كۇشىنە ەنەدى.
تۇزەتۋلەر سىبايلاس جەمقورلىق قىلمىستارىن جاساعان، سونداي-اق سىبايلاس جەمقورلىق قۇقىق بۇزۋشىلىقتارى ءۇشىن اكىمشىلىك جاۋاپكەرشىلىككە تارتىلعان ازاماتتاردى جەكەلەگەن لاۋازىمدارعا قابىلداۋ كەزىندەگى شەكتەۋلەردى كەڭەيتەدى.
مەملەكەتتىك مەكەمەلەر مەن كۆازيمەملەكەتتىك سەكتور سۋبەكتىلەرى ءۇشىن سيفرلىق كادرلىق جۇيەدە كادرلىق پروسەستەردى جۇرگىزۋ تۋرالى جاڭا تاراۋ ەنگىزىلەدى. ول كادرلىق قۇجاتتاردى رەسىمدەۋدى، ەسەپكە الۋدى، ساقتاۋدى جانە قىزمەتكەرلەر تۋرالى مالىمەتتەردى ەلەكتروندى فورماتتا جۇرگىزۋدى كوزدەيدى.
25 تامىزدان باستاپ جۇمىس بەرۋشىلەر كيبەرقاۋىپسىزدىك سالاسىندا جاڭا مىندەت الادى. ولار قىزمەتكەرلەردى كيبەرقاۋىپسىزدىك جونىندەگى ىشكى قۇجاتتاردىڭ تالاپتارىمەن تانىستىرۋعا جانە ولاردىڭ ساقتالۋىن باقىلاۋدى ۇيىمداستىرۋعا مىندەتتى بولادى.
سونىمەن بىرگە كيبەرقاۋىپسىزدىك تالاپتارىن ساقتاۋ قىزمەتكەرلەردىڭ وزدەرىنە دە مىندەت بولادى.
تامىزداعى وزگەرىستەرگە بايلانىستى جۇمىس بەرۋشىلەرگە جەرگىلىكتى كادرلىق قۇجاتتاردى، ونىڭ ىشىندە حابارلاما نىساندارىن، ەڭبەك شارتتارىن توقتاتۋ ءتارتىبىن، ماتەريالدىق جاۋاپتى قىزمەتكەرلەردى جۇمىستان بوساتۋ راسىمدەرىن، تارتىپتىك جاۋاپكەرشىلىك، مەديسينالىق تەكسەرۋلەر، ەڭبەكتى قورعاۋ جانە كيبەرقاۋىپسىزدىك تۋرالى ەرەجەلەردى جاڭارتۋ ۇسىنىلادى.
مەملەكەتتىك مەكەمەلەر مەن كۆازيمەملەكەتتىك سەكتور ۇيىمدارىنا دا سىبايلاس جەمقورلىققا قارسى جاڭا تالاپتار مەن سيفرلىق كادرلىق جۇيەدە كادرلىق پروسەستەردى جۇرگىزۋ ەرەجەلەرىن ەسكەرۋ قاجەت.