2050 جىلعا قاراي قازاقستان حالقى 26،5 ميلليون ادامعا جەتۋى مۇمكىن، ال مەملەكەتكە زەينەتكەرلەردى قامتاماسىز ەتۋ قيىنداي تۇسپەك. سوندىقتان ازاماتتارعا قارتايعان كۇنگە الدىن الا دايىندالۋ قاجەت، دەپ حابارلايدى infohub.kz سايتى.
ءبىرىڭعاي جيناقتاۋشى زەينەتاقى قورىنىڭ (بجزق) دەموگرافيالىق بولجامدارى بويىنشا، ەل حالقىنىڭ سانى وسە بەرەدى. الايدا جاس قۇرىلىمى دا وزگەرەدى: ءومىر ءسۇرۋ ۇزاقتىعى ارتادى، ال تۋۋ كورسەتكىشى تومەندەيدى، بۇل ەگدە جاستاعى ازاماتتار ۇلەسىنىڭ وسۋىنە اكەلەدى. ماسەلەن، 2021–2025 جىلدارى قازاقستاندىقتاردىڭ ءومىر ءسۇرۋ ۇزاقتىعى 70،23 جاستان 75،97 جاسقا دەيىن ءوستى.
قازىرگى ۋاقىتتا 65 جاستان اسقاندار ەل حالقىنىڭ 9،6%-ىن قۇرايدى. بجزق مەن بۇۇ بولجامى بويىنشا، 2050 جىلعا قاراي 60 جاستان اسقان ازاماتتاردىڭ ۇلەسى 18،8%-عا دەيىن ارتادى. ناتيجەسىندە 65 جاستان اسقان ءبىر ادامعا ەڭبەككە جارامدى جاستاعى نەبارى 3،42 ادام كەلەدى. سالىستىرۋ ءۇشىن: 2012 جىلى بۇل كورسەتكىش 7،68 بولسا، 2025 جىلى – 4،95.
بجزق دەموگرافيالىق وزگەرىستەر اياسىندا جيناقتاۋشى زەينەتاقى جۇيەسىنىڭ ءرولى ارتاتىنىن اتاپ وتەدى. قاراپايىم تىلمەن ايتقاندا، بولاشاقتا ازاماتتاردىڭ زەينەتاقى تابىسى مەملەكەتتىك تولەمدەرگە ەمەس، جەكە جيناقتارىنا كوبىرەك تاۋەلدى بولادى. قازاقستاندىقتارعا دەموگرافيالىق جاعداي مەن بيۋدجەت مۇمكىندىكتەرىنە ازىراق تاۋەلدى بولۋ ءۇشىن جەكە زەينەتاقى كاپيتالىن الدىن الا قالىپتاستىرۋ ۇسىنىلادى.
ول ءۇشىن ازاماتتار: رەسمي جۇمىس ىستەپ، زەينەتاقى جارنالارىن تۇراقتى تولەۋ؛ ەرىكتى زەينەتاقى جارنالارىن ەنگىزۋ؛ جيناقتارىنىڭ ينۆەستيسيالىق ستراتەگياسىنا ءوز بەتىنشە اسەر ەتۋ – بۇل مۇمكىندىك 2026 جىلدىڭ 7 قىركۇيەگىنەن باستاپ پايدا بولادى. بۇعان دەيىن بجزق زەينەتاقىعا جيناقتاۋدىڭ ماڭىزدىلىعىن جانە جاس كەزىندە جيناقتى تۇرعىن ءۇي جاعدايىن جاقسارتۋعا جۇمساماۋ كەرەكتىگىن دە تۇسىندىرگەن بولاتىن.