الەمگە ايگىلى ءانشى ەنريكە يگلەسياستىڭ 3 قىركۇيەكتە ەلوردادا وتەتىن كوپتەن كۇتكەن كونسەرتى قارساڭىندا استانا اكىمدىگى قالا تۇرعىندارىنا ماڭىزدى حابارلامامەن ۇندەۋ جاسادى، دەپ حابارلايدى infohub.kz سايتى.
اكىمدىكتىڭ ءباسپاسوز قىزمەتى كونسەرتتىڭ ساعات 20:00-دە باستالاتىنىن ەسكە سالدى. كورەرمەندەرگە قولايلى جاعداي جاساۋ جانە كولىك جۇكتەمەسىن ازايتۋ ءۇشىن سول كۇنى ارنايى شاتتل-باعىتتار ۇيىمداستىرىلادى. اۆتوبۋستار ساعات 16:00-دەن باستاپ قالانىڭ ءتورت نۇكتەسىنەن «استانا ارەنا» ستاديونىنا دەيىن، سونداي-اق ءىس-شارا اياقتالعان سوڭ كەرى باعىتتا جولاۋشىلاردى جەتكىزۋدى قامتاماسىز ەتەدى.
ارنايى كولىك قوزعالىسىنىڭ باعىتتارىنا مىنا تۇراقتار كىرەدى: ەلوردالىق سيرك ماڭى، «حازرەت سۇلتان» مەشىتى، قاجىمۇقان كوشەسىندەگى «قازاقستان» سپورت كەشەنى جانە «نۇر-سۇلتان» مەشىتى (باس مەشىت).
«شاتتل-باستار ەكى باعىتتا دا – كونسەرت باستالعانعا دەيىن جانە ول اياقتالعاننان كەيىن قاتىنايدى. قوسىمشا شاتتل-باعىتتاردىڭ ىسكە قوسىلۋى جولداردىڭ شامادان تىس جۇكتەلۋىن بولدىرماۋعا مۇمكىندىك بەرەدى جانە ەلوردانىڭ بارلىق تۇرعىندارى ءۇشىن جايلى ءجۇرىپ-تۇرۋ جاعدايىن قامتاماسىز ەتەدى»، – دەلىنگەن رەسمي حابارلامادا.
سونىمەن قاتار، كورەرمەندەر كونسەرت وتەتىن ورىنعا تەز ءارى ىڭعايلى جەتۋگە مۇمكىندىك بەرەتىن «تارلان استانا» جەڭىل رەلستى كولىگىن پايدالانا الادى.
ەسكە سالا كەتەيىك، ناۋرىز ايىندا ەنريكە يگلەسياس قازاقستاندا ەكى كونسەرت بەرەتىنىن مالىمدەگەن بولاتىن: الماتى مەن استانادا. الماتىداعى ونەر كورسەتۋ 5 قىركۇيەككە جوسپارلانعان.