الەمگە ايگىلى ءانشى ەنريكە يگلەسياس استاناعا كەلدى، بۇگىن ونىڭ كوپتەن كۇتكەن كونسەرتى وتەدى. ءارتىس قازاقستانداعى جانكۇيەرلەرىمەن بىرگە تۇسكەن كادرلاردى الەۋمەتتىك جەلىدە ءبولىسىپ ۇلگەردى، دەپ حابارلايدى infohub.kz سايتى.
قازاقستاندىقتار الەۋمەتتىك جەلىلەردە ەنريكە يگلەسياستىڭ ەلورداعا كەلگەن ءساتىن بەينەلەيتىن فوتوسۋرەتتەر مەن بەينەجازبالاردى بەلسەندى تۇردە جاريالاۋدا. Instagram-داعى Aizhanmua دەگەن قولدانۋشى وزگە قىزدارمەن بىرگە ءانشىنىڭ پورترەتتەرىن ۇستاپ، ۇشۋ ايماعىندا ونى كۇتىپ تۇرعانىن كورسەتەتىن روليك جاريالادى. كادرلاردا يگلەسياستىڭ پاسپورتتىق باقىلاۋ قىزمەتكەرىمەن سۋرەتكە ءتۇسىپ قانا قويماي، ونى كۇتىپ تۇرعان جانكۇيەرلەرگە دە بىرلەسكەن سۋرەتكە تۇسۋدەن باس تارتپاعانى كورىنەدى.
قازاقستانداعى كونسەرتتەرگە ارنالعان Galaconcert.kz اككاۋنتى ەنريكەنىڭ ۇشاقتان ءتۇسىپ كەلە جاتقانىن بەينەلەيتىن ۆيدەو جاريالادى. روليككە بەرىلگەن سيپاتتامادا: «ەنريكە ەكەۋمىز ءبىر اۋامەن تىنىستاپ جاتىرمىز» دەلىنگەن.
سونىمەن قاتار، جەلىدە جاساندى ينتەللەكت كومەگىمەن جاسالعان يگلەسياستىڭ بەينەسى بار كۇلكىلى مەمدەر پايدا بولدى.
ەسكە سالايىق، ناۋرىز ايىندا اتاقتى ورىنداۋشى قازاقستاندا قىركۇيەكتە الماتى مەن استانادا وتەتىن ەكى كونسەرتىن جاريالاعان بولاتىن. استاناداعى ونەر كورسەتۋ 3 قىركۇيەككە جوسپارلانعان، ال الماتىدا ءارتىس 5 قىركۇيەكتە ساحناعا شىعادى. استانا اكىمدىگى كورەرمەندەرگە ىڭعايلى بولۋ جانە كولىك جۇكتەمەسىن ازايتۋ ءۇشىن كونسەرت كۇنى ارنايى شاتتل باعىتتارى ۇيىمداستىرىلاتىنىن حابارلادى. سونداي-اق، ءىس-شارا وتەتىن كوشەلەردە قوزعالىستىڭ شەكتەلەتىنى بەلگىلى بولدى.