جاپونيادا ءوتىپ جاتقان ازيادا-2026 ويىندارىندا جەكە كوپسايىس فينالىندا قازاقستاندىق گيمناستشىلار اقمارال ەرەكەشەۆا مەن ايبوتا ەرتاي قىزى ءتورتىنشى جانە بەسىنشى ورىنداردى يەلەندى، دەپ حابارلايدى infohub.kz سايتى.
ءتورت جاتتىعۋ قورىتىندىسى بويىنشا ەرەكەشەۆا 108 بالل جينادى. قولا مەدالعا ول 1،200 بالل جەتپەدى. قازاقستاندىق سپورتشى شەڭبەرمەن 28،900 بالل، دوپپەن 27،300، شىعىرشىقتارمەن 25،200 جانە لەنتامەن 26،600 بالل الدى.
ەرتاي قىزى فينالدى 106،200 باللمەن بەسىنشى ورىندا اياقتادى. ونىڭ باعالارى: شەڭبەر – 27،250، دوپ – 26،450، شىعىرشىقتار – 25،700، لەنتا – 26،800.
جەڭىستى ازيادا-2022 چەمپيونى جانە ازيانىڭ ءابسوليۋتتى چەمپيونى وزبەكستاندىق تاحمينا يكروموۆا (112،950) جەڭىپ الدى. كۇمىستى قىتايلىق ۆان سي (110،050)، قولانى ونىڭ وتانداسى ۆان سزىلۋ (109،200) ەنشىلەدى.
ىرىكتەۋدە ەرەكەشەۆا بارلىق قاتىسۋشىلار اراسىندا ۇزدىك ناتيجە كورسەتتى – 111،350 بالل، ال ەرتاي قىزى 106،550 باللمەن ءتورتىنشى ورىنعا تۇراقتادى.
بۇگىن سونداي-اق توپتىق كوپسايىس فينالى وتەدى. ءبىزدىڭ قۇراما شەشۋشى كەزەڭگە ءبىرىنشى ورىنمەن جولداما الدى.
جاپونياداعى XX جازعى ازيا ويىندارى 19 قىركۇيەكتە رەسمي تۇردە اشىلدى. 45 ەلدىڭ سپورتشىلارى قاتىساتىن جارىستاردا 460 مەدال جيىنتىعى ساراپقا سالىنادى. ازيادا-2026-دا قازاقستان قۇراماسىنىڭ قۇرامىندا 35 سپورت تۇرىنەن 558 سپورتشى سىنعا تۇسۋدە.