2027 جىلدىڭ ورتاسىنان باستاپ قازاقستان بانكتەرى تۇراقتى دامۋ ستاندارتتارىن (ESG) كۇشەيتۋگە مىندەتتى بولادى: بەيىندى بولىمشەلەر قۇرۋ، قىزمەتكەرلەردى وقىتۋ جانە ESG-ەسەپتەرىن دايىنداۋ. بانكتەردىڭ نەگىزگى شىعىندارى ادىستەمەلىك بازانى قالىپتاستىرۋعا، اناليتيكا جيناۋعا جانە ەكولوگتاردى تارتۋعا كەتەدى، دەپ حابارلايدى infohub.kz سايتى.
ESG (Environmental، Social، and Governance) — ەكولوگيا، الەۋمەتتىك جاۋاپكەرشىلىك جانە كورپوراتيۆتىك باسقارۋ ماسەلەلەرىن قامتيتىن ستاندارتتار جيىنتىعى. ەكولوگيالىق باعىت قورشاعان ورتانى قورعاۋدى، كومىرقىشقىل گازىنىڭ شىعارىندىلارىن ازايتۋدى، رەسۋرستاردى ۇنەمدەۋدى جانە قالدىقتاردى قايتا وڭدەۋدى قامتيدى. الەۋمەتتىك جاۋاپكەرشىلىك ءقاۋىپسىز ەڭبەك جاعدايلارىن، قىزمەتكەرلەرگە لايىقتى جالاقى مەن قولداۋ كورسەتۋدى، ينكليۋزيۆتىلىك پەن قايىرىمدىلىقتى بىلدىرەدى. كورپوراتيۆتىك باسقارۋ — ادال جانە اشىق باسشىلىق، سىبايلاس جەمقورلىققا قارسى كۇرەس، قىزمەتتىڭ اشىقتىعى جانە اكسيونەرلەردىڭ قۇقىقتارىن قورعاۋ.
ESG ستاندارتتارىن ەنگىزۋ كومپانيالاردىڭ تۇراقتى دامۋعا، اشىقتىققا جانە تاۋەكەلدەردى جاۋاپكەرشىلىكپەن باسقارۋعا ۇمتىلىسىن كورسەتەدى. بۇل ولاردىڭ ينۆەستيسيالىق تارتىمدىلىعىن ارتتىرىپ، وپەراسيالىق تاۋەكەلدەردى ازايتادى جانە نارىقتاعى بەدەلىن جاقسارتادى.
ادەتتە بۇل ەرىكتى شەشىم. الايدا «رۋچنايا ەكونوميكا» Telegram-ارناسى سوڭعى جىلدارى قازاقستاندا قارجى ۇيىمدارى ءۇشىن ESG-اقپاراتتى اشۋ كەزەڭ-كەزەڭىمەن مىندەتتى بولا باستاعانىن حابارلايدى. ال 2027 جىلدىڭ ورتاسىنان باستاپ بانكتەر وسىنداي ستاندارتتاردى كۇشەيتۋگە مىندەتتى بولادى، بۇل ولاردىڭ شىعىندارىنىڭ وسۋىنە اكەلەدى.
«بانكتەرگە تۇراقتى دامۋ جونىندەگى بولىمشەلەر قۇرۋ نەمەسە قىزمەتكەرلەر تارتۋ مىندەتتەلەدى، ولار ESG پراكتيكالارىن ەنگىزىپ، ءتيىستى قۇجاتتاردى ازىرلەپ، قىزمەتكەرلەردى تۇراقتى دامۋ، ەكولوگيالىق جانە الەۋمەتتىك تاۋەكەلدەر بويىنشا وقىتىپ، ESG-ەسەبىن دايىنداۋدى ۇيلەستىرەدى»، — دەلىنگەن دەرەككوزدە.
دەرەككوزدىڭ حابارلاۋىنشا، ەۋرازيالىق بانك باسقارماسىنىڭ ءتوراعاسى ءلاززات ساتيەۆا ESG تالاپتارىن كۇشەيتۋ كەزىندە بانكتەر ءۇشىن نەگىزگى شىعىندار ادىستەمەلىك بازانى قالىپتاستىرۋعا، اناليتيكالىق اقپارات جيناۋعا، سونىڭ ىشىندە بانك شتاتىنا ەكولوگتاردى تارتۋعا جانە كونسالتينگكە بايلانىستى تۋىندايتىنىن اتاپ ءوتتى. الايدا ول ESG-گە ارنالعان مۇنداي شىعىنداردىڭ ءوسۋى حالىققا ارنالعان كرەديتتىك ونىمدەرگە اۋىستىرىلۋى مۇمكىن دەپ سانامايدى.
«ءبىز بۇل شىعىنداردى كرەديتتەۋ قۇنىنىڭ وسۋىنە اكەپ سوعاتىن فاكتور رەتىندە قاراستىرمايمىز. كرەديت مولشەرلەمەسى فاكتورلاردىڭ تۇتاس كەشەنىن ەسكەرە وتىرىپ قالىپتاسادى، سوندىقتان بانكتىڭ ESG-پراكتيكالارىن ەنگىزۋگە جۇمساعان شىعىندارىنىڭ كرەديتتەۋ قۇنىنا تىكەلەي اسەرى تۋرالى ايتۋ دۇرىس بولماس ەدى»، — دەدى ءلاززات ساتيەۆا.
ياعني، ESG قاعيداتتارىن ەنگىزۋ ءتاسىلىن كۇشەيتۋ تالابى ەكىنشى دەڭگەيدەگى بانكتەردىڭ شىعىندارىنىڭ ۇلعايۋىنا اكەلۋى مۇمكىن. الايدا بۇل ولاردى وتەۋ ءۇشىن كرەديتتەۋ قۇنىنا اسەر ەتپەۋى ءتيىس.