بينگەمتون ۋنيۆەرسيتەتىنىڭ (اقش) ماماندارى گيپپوكامپ — ەستە ساقتاۋعا جاۋاپتى مي بولىگى — جۇمىسىنداعى العاشقى اقاۋلار 30 جاستان كەيىن پايدا بولاتىنىن انىقتادى. بۇل جاڭالىق ەستە ساقتاۋ پروبلەمالارى تەك قارتايعاندا عانا تۋىندايدى دەگەن بۇرىنعى تۇسىنىكتى جوققا شىعارادى. زەرتتەۋ ناتيجەلەرى Cerebral Cortex جۋرنالىندا جاريالاندى، دەپ حابارلايدى infohub.kz سايتى.
ەكسپەريمەنت بارىسىندا عالىمدار 18 بەن 74 جاس ارالىعىنداعى 60-قا جۋىق ەرىكتىنىڭ ميىنا فۋنكسيونالدى مرت جاسادى. قاتىسۋشىلارعا ءارتۇرلى زاتتار مەن فوندىق سۋرەتتەرمەن بىرگە ادامداردىڭ فوتوسۋرەتتەرى كورسەتىلدى. كەيىنگى ەستە ساقتاۋ تەستىندە 30 بەن 50 جاس ارالىعىنداعى ادامدار تانىس بەتتى قاتە زاتپەن بايلانىستىرىپ، ءجيى قاتەلەستى. ولار بۇل سۋرەتتەردى كورگەندەرىن ەسىنە ساقتادى، ءبىراق باستاپقى جۇپتى ءدال قايتا شىعارا المادى.
زەرتتەۋ اۆتورلارى بۇل اسەردى ەستەلىكتەردى كودتاۋعا، نىعايتۋعا جانە قايتا شىعارۋعا جاۋاپتى مي ايماعى — گيپپوكامپتاعى اقاۋلارمەن بايلانىستىرادى. بۇعان دەيىن ەگدە جاستاعى ادامدارداعى مۇنداي قاتەلىكتەر گيپپوكامپ بەلسەندىلىگىنىڭ تومەندەۋىنەن بولادى دەپ ەسەپتەلگەن ەدى. الايدا توموگرافيا كەرىسىنشە كورسەتتى: ەگدە جاستاعى توپ قاتەلەسكەندە گيپپوكامپ جوعارى بەلسەندىلىك تانىتىپ، ناقتى بولشەكتەردى ەمەس، تەك جالپى كونتەكستى قايتا جاڭعىرتتى.
پسيحولوگيا كافەدراسىنىڭ دوسەنتى يان ماكدونوۋ ورتا جاس ەستە ساقتاۋ فۋنكسيالارى ءۇشىن ماڭىزدى وتپەلى كەزەڭ ەكەنىن اتاپ ءوتتى. عالىمدار كوگنيتيۆتى بۇزىلۋلاردىڭ الدىن الۋ جولدارىن تابۋ ءۇشىن ءدال وسى جاس توبىن ودان ءارى زەرتتەۋ قاجەتتىگىن ايتادى.