اقش-تىڭ ازىق-ت ۇلىك جانە دارى-دارمەك باسقارماسى (FDA) ۇيقى بەزىنىڭ قاتەرلى ىسىگىن ەمدەۋگە ارنالعان پرەپاراتتى ماقۇلدادى. كلينيكالىق سىناقتاردا بۇل ءدارى ناۋقاستاردىڭ جالپى ءومىر ءسۇرۋ ۋاقىتىن ەكى ەسەگە جۋىق ۇزارتقان. Rasonque برەندىمەن ساتىلاتىن جانە Revolution Medicines شىعاراتىن داراكروناسيب پرەپاراتى الەمدەگى ەڭ ءقاۋىپتى قاتەرلى ىسىكتەردىڭ ءبىرىن ەمدەۋدە سەرپىلىس جاساعانداي بولدى. 500 ناۋقاس قاتىسقان كەش كەزەڭدەگى كلينيكالىق سىناقتا كۇندەلىكتى قابىلداناتىن تابلەتكانى ىشكەندەردىڭ ورتاشا ءومىر ءسۇرۋ ۋاقىتى 13،2 ايدى قۇراسا، حيميوتەراپيا قابىلداعانداردا بۇل كورسەتكىش 6،6 اي بولدى. FDA پرەپارات «وتە قيىن جانە تاريحي تۇرعىدان ەمدەۋ قيىن قاتەرلى ىسىكپەن بەتپە-بەت كەلگەن ناۋقاستار ءۇشىن ماڭىزدى جاڭا مۇمكىندىك» ەكەنىن اتاپ ءوتتى. داراكروناسيب مۋتاسيالانعان KRAS گەنىن بلوكتاپ، ءوشىرۋ ارقىلى قاتەرلى ىسىكتىڭ تارالۋىن بولدىرمايدى. بۇل گەن ۇيقى بەزىنىڭ ىسىكتەرىنىڭ 90%-دان استامىندا كەزدەسەدى جانە قاتەرلى ىسىكتىڭ ءوسۋىن ىنتالاندىرادى. امەريكاندىق قاتەرلى ىسىك قوعامىنىڭ مالىمەتىنشە، جىل سايىن اقش-تا شامامەن 67 000 ادامعا ۇيقى بەزىنىڭ قاتەرلى ىسىگى دياگنوزى قويىلادى. بۇل اۋرۋ بارلىق ءىرى قاتەرلى ىسىكتەردىڭ ىشىندەگى ەڭ جوعارى ءولىم كورسەتكىشىنە يە. ۇيقى بەزىنىڭ قاتەرلى ىسىگى كوبىنەسە كەش انىقتالادى جانە ەمدەۋ وتە قيىن. اۋرۋمەن اۋىراتىنداردىڭ جارتىسىنان كوبى دياگنوز قويىلعاننان كەيىن ءۇش اي ىشىندە قايتىس بولادى. 2025 جىلى FDA بۇل پرەپاراتقا «سەرپىندى تەراپيا» مارتەبەسىن بەردى. بۇل مارتەبە اۋىر جاعدايلاردى ەمدەۋگە ارنالعان جانە جەدەلدەتىلگەن قاراۋدى قاجەت ەتەتىن دارىلەرگە بەرىلەدى. اگەنتتىكتىڭ ونكولوگيا ورتالىعىنىڭ ديرەكتورى اندجەلو دە كلارونىڭ ايتۋىنشا، FDA پرەپاراتتى رەتتەۋ مەرزىمىنەن التى اي بۇرىن ماقۇلداعان، سەبەبى ول «قاجەتتىلىك جوعارى سالادا بۇرىن-سوڭدى بولماعان ناتيجەلەردى كورسەتتى». FDA-نىڭ مالىمەتىنشە، ەمدەۋدىڭ ەڭ ءجيى كەزدەسەتىن جاناما اسەرلەرى — بورتپە، ديارەيا، جۇرەك اينۋ، شارشاۋ جانە قۇسۋ. سىناقتا داراكروناسيب قابىلداعان ناۋقاستاردىڭ شامامەن 44%-ىندا اۋىر جاناما اسەرلەر بايقالسا، حيميوتەراپيا قابىلداعانداردا بۇل كورسەتكىش 57،5% بولدى. اقش-تىڭ بۇرىنعى سەناتورى بەن ساسس جەلتوقسان ايىندا ۇيقى بەزىنىڭ قاتەرلى ىسىگىنىڭ 4ء-شى ساتىسى دياگنوزى قويىلعانىن جاريالاعان. ول ءقازىر وسى پرەپاراتتىڭ كلينيكالىق سىناعىنا قاتىسىپ، ءدارى ىسىكتەردىڭ كىشىرەيۋىنە كومەكتەسكەنىن ايتقان.