2026 جىلعى فۋتبولدان الەم چەمپيوناتىنىڭ فينالدىق ماچى يسپانيا مەن ارگەنتينا قۇرامالارى اراسىندا ءوتۋى كۇردەلەنە ءتۇستى. نيۋ-يورك پەن نيۋ-دجەرسيدەگى اۋا ساپاسىنىڭ ناشارلاۋى ويىنعا ءقاۋىپ ءتوندىرىپ وتىر. ينفوپورتالىمىز infohub.kz-دىڭ حابارلاۋىنشا، سەبەپ — كاناداداعى ءىرى ورمان ورتتەرىنىڭ ءتۇتىنى.
ءتۋرنيردىڭ شەشۋشى كەزدەسۋى 19 شىلدەدە يست-راتەرفوردتاعى «MetLife» ستاديونىندا ءوتۋى ءتيىس. بۇل ارەنا نيۋ-يورككە جاقىن ورنالاسقان نيۋ-دجەرسي شتاتىندا، ال سوڭعى كۇندەرى كانادالىق ورتتەردەن شىققان ءتۇتىن وسى ايماققا جەتكەن.
Reuters دەرەگىنشە، ءتۇتىن اقش-تىڭ سولتۇستىك-شىعىسىن تۇمشالاپ، نيۋ-يورك پەن نيۋ-دجەرسيدە دەنساۋلىققا قاتىستى ەسكەرتۋلەر جاسالدى. اۋا رايى بولجامشىلارى جەكسەنبىگە قاراي جاڭبىر مەن جەلدىڭ باعىتىنىڭ وزگەرۋى احۋالدى جاقسارتۋى مۇمكىن دەپ وتىر، ءدال سول كۇنى فينال وتەدى دەپ جوسپارلانعان.
اۋانىڭ لاستانۋى ماچقا دايىندىققا اسەر ەتتى. يسپانيا قۇراماسى نيۋ-دجەرسيدىڭ سولتۇستىگىندە اشىق اسپان استىندا جاتتىعۋ وتكىزدى، اينالا ءتۇتىن بولسا دا. Associated Press جاتتىعۋ ايماعىنداعى جاعدايدى ورمان ءورتىنىڭ تۇتىنىنە بايلانىستى ءقاۋىپتى دەپ باعالاعان.
فينالدى باسقا كۇنگە اۋىستىرۋ تۋرالى رەسمي مالىمدەمە ازىرگە جوق. الايدا ۇيىمداستىرۋشىلار جاعدايدى باقىلاپ وتىر، سەبەبى «MetLife» ستاديونىنىڭ توبەسى جابىق ەمەس، سوندىقتان اۋا ساپاسى فۋتبولشىلارعا دا، كورەرمەندەرگە دە تىكەلەي اسەر ەتۋى مۇمكىن.
ءتۇتىن اقش-تاعى باسقا سپورتتىق ءىس-شارالارعا دا اسەر ەتتى: MLSء-تىڭ «چيكاگو فاير» مەن «ۆانكۋۆەر ۋايتكەپس» اراسىنداعى ماچى اۋا ساپاسىنىڭ ناشارلىعىنان كەيىنگە قالدىرىلدى. وسىعان بايلانىستى 2026 جىلعى الەم چەمپيوناتى فينالىن وتكىزۋ ماسەلەسى ماچقا بىرنەشە كۇن قالعاندا تالقىلانا باستادى.
الەم چەمپيوناتىنىڭ فينالىندا يسپانيا مەن ارگەنتينا كەزدەسەدى. يسپاندىقتار جارتىلاي فينالدا فرانسيانى 2:0 ەسەبىمەن، ال ارگەنتينالىقتار انگليانى 2:1 ەسەبىمەن جەڭگەن بولاتىن.