قازاقستاندا قارجىلىق قىزمەت تۇتىنۋشىلارى بانكتەرگە تىكەلەي جۇگىنە الاتىن FinOtinish سيفرلىق پلاتفورماسىنىڭ پيلوتتىق نۇسقاسى ىسكە قوسىلدى. سەرۆيستى قازاقستان رەسپۋبليكاسىنىڭ قارجى نارىعىن رەتتەۋ جانە دامىتۋ اگەنتتىگى باستاماشىلىق ەتتى، دەپ حابارلايدى infohub.kz سايتى.
جاڭا قۇرال قارىز الۋشىلارعا قارجى ۇيىمىنا ءوتىنىش بەرىپ، ونىڭ قارالۋ بارىسىن باقىلاۋ مۇمكىندىگىن بەرەدى. ەگەر ماسەلە بانك دەڭگەيىندە شەشىلمەسە، ءوتىنىشتى بانك ومبۋدسمانىنا جىبەرۋگە بولادى.
ءوتىنىمدى راسىمدەۋ كەزىندە پايدالانۋشى ءوزىن قىزىقتىراتىن تاقىرىپتى تاڭدايدى — مەرزىمى وتكەن تولەمدەر مەن بانكتەن كەلگەن قاجەتسىز قوڭىراۋلاردان باستاپ كەشبەك ماسەلەلەرى مەن ءموبيلدى قوسىمشانىڭ جۇمىسىنداعى اقاۋلارعا دەيىن.
قازىرگى تاڭدا پلاتفورما ارقىلى ەكىنشى دەڭگەيدەگى ءتورت بانككە جۇگىنۋگە بولادى: Freedom Bank، «بانك سەنتركرەديت»، Alatau City Bank جانە «وتباسى بانك».
پيلوتتىق جوبانىڭ قورىتىندىسى بويىنشا قالعان بانكتەردى كەزەڭ-كەزەڭىمەن قوسۋ جانە پلاتفورمانىڭ تۇتىنۋشىلار ءۇشىن قولجەتىمدىلىگىن كەڭەيتۋ جوسپارلانۋدا.
سەرۆيستى پايدالانۋ ەرىكتى جانە تەگىن. سونىمەن قاتار ازاماتتاردىڭ اگەنتتىككە e-Otinish جۇيەسى ارقىلى، بانك ومبۋدسمانىنا نەمەسە سوتقا جۇگىنۋ مۇمكىندىگى ساقتالادى.
بۇعان دەيىن قازاقستاندا قارىز الۋشىلار ءوز قارىزدارىن بارلىق كرەديتورلارمەن بىردەن رەتتەۋگە مۇمكىندىك بەرەتىن Finkelisim.kz ءبىرىڭعاي پلاتفورماسى ىسكە قوسىلعان بولاتىن.