قازاقستاندىق FlyArystan اۋەكومپانياسى قىتايعا جانە قىتايدان ۇشاتىن جولاۋشىلارعا شەكارادان ءوتۋ ەرەجەلەرىنىڭ الداعى وزگەرىستەرى تۋرالى ماڭىزدى ەسكەرتۋ جاسادى، دەپ حابارلايدى infohub.kz سايتى.
2026 جىلدىڭ 15 قىركۇيەگىنەن باستاپ قحر-دا كىرۋ جانە شىعۋدىڭ جاڭارتىلعان ەرەجەلەرى كۇشىنە ەنەدى. وسىعان بايلانىستى يمميگراسيالىق باقىلاۋدان ءوتۋ كەزىندە قۇجاتتاردى تەكسەرۋ راسىمدەرى ادەتتەگىدەن ۇزاعىراق ۋاقىت الۋى مۇمكىن.
اۋەكومپانيانىڭ ءباسپاسوز قىزمەتى قىتايعا باراتىن نەمەسە ەلدەن ۇشاتىن جولاۋشىلارعا ساپارعا قاجەتتى بارلىق قۇجاتتاردىڭ، ونىڭ ىشىندە پاسپورتتىڭ بار-جوعىن جانە جارامدىلىعىن الدىن الا تەكسەرۋدى، سونداي-اق قحر-عا كىرۋ جانە شىعۋ تالاپتارىمەن تانىسۋدى ۇسىندى. اسىرەسە، اۋەجايدا ۇشۋدان كەمىندە ءۇش ساعات بۇرىن بولۋ كەرەكتىگى، پاسپورتتىق جانە يمميگراسيالىق باقىلاۋدان وتۋگە قوسىمشا ۋاقىت قاجەت ەكەندىگى اتاپ ءوتىلدى.
FlyArystan قازاقستان مەن جۇڭگو اراسىنداعى ۆيزاسىز رەجيم ءالى دە جارامدى ەكەنىن ەسكە سالدى. قازاقستان ازاماتتارى ءبىر ساپار بارىسىندا قحر-دا ۆيزاسىز 30 كۇنتىزبەلىك كۇنگە دەيىن بولا الادى.