فرانكفۋرت اۋەجايىندا بەزگەك ىندەتىنىڭ سيرەك جاعدايى تىركەلىپ، التى قىزمەتكەر جۇقتىرعان ەدى. سونىڭ سالدارىنان ءبىر قىزمەتكەر قايتىس بولدى. قالعان بەسەۋى ەم الۋدا. ماسالار ۇشاقپەن كەلگەن دەپ بولجانۋدا.
گەرمانيانىڭ قوعامدىق دەنساۋلىق ساقتاۋ ورگاندارىنىڭ مالىمەتىنشە، ماسالار ەلدەگى ەڭ ءىرى اۋەجايعا ۇشاقپەن جەتكەن. اۋەجاي وپەراتورى Fraport وكىلىنىڭ ايتۋىنشا، قالعان بەس جۇقتىرعان ادام ەم قابىلداپ جاتىر. اۋەجايعا تۇزاقتار قويىلىپ، اۋلانعان ماسالار ءتۇرى مەن شىعۋ تەگىن انىقتاۋ ءۇشىن زەرتحاناعا جىبەرىلەدى.
Fraport وكىلى BBC-گە: «وكىنىشكە قاراي، ءبىر قىزمەتكەردىڭ ينفەكسيادان قايتىس بولعانىن راستاۋعا ءماجبۇرمىز. ءبىز بارلىق قىزمەتكەرگە تولىق اقپارات بەردىك جانە قانداي دا ءبىر بەلگىلەر بايقالسا، دارىگەرگە قارالۋعا شاقىرامىز»، — دەدى.
شىلدە ايىندا ىندەت ءتورت قىزمەتكەردى جۇقتىرعانى حابارلانعان بولاتىن. گەرمانيانىڭ اۋرۋلاردى باقىلاۋ جانە الدىن الۋ جونىندەگى فەدەرالدى مەكەمەسى روبەرت كوح ينستيتۋتىنىڭ مالىمەتىنشە، ءتورت قىزمەتكەر 4-6 شىلدە ارالىعىندا اۋىرىپ، ماسالار ۇشاقپەن اكەلىنگەن. ينستيتۋت گەرمانيادا بەزگەك نەگىزىنەن بەزگەك تارالعان ايماقتاردا جۇقتىرعان ۇزاق ساپارلاردان ورالعانداردا كەزدەسەتىنىن، ال اۋەجاي ىشىندە جۇعۋى سيرەك ەكەنىن اتاپ ءوتتى.
ينستيتۋت ەپيدەميولوگيالىق بيۋللەتەنىندە: «ساپار تاريحىنىڭ بولماۋى دياگنوزدىڭ كەش قويىلۋىنا اكەلۋى مۇمكىن. كەش دياگنوز اۋرۋدىڭ اۋىر ءوتۋ ءقاۋپىن ارتتىرادى»، — دەلىنگەن. سوڭعى رەت اۋەجاي بەزگەگى 2023 جىلى تاعى دا فرانكفۋرت اۋەجايىندا تىركەلگەن.
BBC ىندەتتى تەرگەپ جاتقان فرانكفۋرت قوعامدىق دەنساۋلىق ساقتاۋ دەپارتامەنتىنە پىكىر سۇراپ حابارلاسقان. دۇنيەجۇزىلىك دەنساۋلىق ساقتاۋ ۇيىمىنىڭ (ددۇ) مالىمەتىنشە، بەزگەك — ماسالاردىڭ كەيبىر تۇرلەرى ارقىلى تارالاتىن، نەگىزىنەن تروپيكالىق ەلدەردە كەزدەسەتىن اۋرۋ. ينفەكسيا پارازيتتەن تۋىندايدى، الدىن الۋعا جانە ەمدەۋگە بولادى، ءبىراق ادامنان ادامعا جۇقپايدى. دەگەنمەن بەلگىلەر جەڭىل نەمەسە ومىرگە ءقاۋىپتى بولۋى مۇمكىن.