Freedom Holding Corp. زاڭگەرلەرى رەسەي فەدەراسياسى باس پروكۋراتۋراسى بەرگەن اكىمشىلىك تالاپ-ارىزدى زەردەلەۋگە كىرىستى. بۇل تۋرالى حولدينگتىڭ ءباسپاسوز قىزمەتى مالىمدەدى، دەپ حابارلايدى infohub.kz سايتى.
«رەسەي فەدەراسياسىنىڭ اۋماعىندا قىزمەت جۇرگىزبەيمىز، اكتيۆتەرىمىز جوق. وسى ءىستى زەردەلەپ، ماتەريالدارىمەن تانىسىپ جاتىرمىز. تۇسىنىكسىزدىك بىلدىرەمىز»، — دەدى Freedom Holding ءباسپاسوز قىزمەتى.
ماسكەۋدىڭ تۆەر اۋداندىق سوتىنىڭ كارتوتەكاسىنداعى دەرەكتەرگە قاراعاندا، اكىمشىلىك تالاپ-ارىز اعىمداعى جىلدىڭ 24 قىركۇيەگىندە تىركەلگەن. ءىس بويىنشا تالاپ قويۋشى — رەسەي فەدەراسياسى باس پروكۋرورىنىڭ ورىنباسارى. الايدا تالاپتىڭ ءمانى اشىلماي وتىر.
اكىمشىلىك جاۋاپكەرلەر رەتىندە W-Empirical Holding Corp.، Freedom Holding Corp. جانە Freedom Finance Europe Ltd. كومپانيالارى كورسەتىلگەن. ءىس بويىنشا جاۋاپكەرلەر قاتارىندا جەكە تۇلعالار — تيمۋر تۋرلوۆ جانە ا.س. ششۋكين دە بار. ءىستى قاراۋعا دايىندىق اياقتالدى، تاراپتاردىڭ الدىن الا اڭگىمەلەسۋى 2026 جىلعى 15 قازانعا بەلگىلەنگەن.
W-Empirical Holding Corp. بۇقارالىق اقپارات قۇرالدارىندا 2025 جىلدىڭ ساۋىرىندە اتالعان بولاتىن. وندا ماسكەۋدىڭ تۆەر اۋداندىق سوتى ينۆەستور سەرگەي كۋلەشەۆكە شەتەلدىك اكسيالاردىڭ قۇنىن مانيپۋلياسيالاۋ ءىسى بويىنشا ءۇش جىل باس بوستاندىعىنان ايىرۋ جازاسىن شارتتى تۇردە تاعايىنداعانى حابارلانعان. تەرگەۋ نۇسقاسى بويىنشا، ول سىبايلاسىمەن بىرگە W-Empirical Holding Corp. قارجى كومپانياسىنىڭ ساۋدا روبوتىن جاڭىلىستىرعان. سوت سونداي-اق W-Empirical Holding Corp.-تىڭ ازاماتتىق تالابىن قاناعاتتاندىرىپ، كۋلەشەۆتەن 162 ملن رۋبلگە جۋىق سومانى ءوندىرىپ الۋعا ۇكىم شىعارعان. بۇل سوما ونىڭ سىبايلاسىمەن بىرگە جالعان مامىلەلەردەن العان تابىسىنا سايكەس كەلەدى. قارىزدى وتەۋدى قامتاماسىز ەتۋ ءۇشىن كۋلەشەۆتىڭ جىلجىمايتىن مۇلكى مەن بارلىق شوتتارىنا تىيىم سالىنعان.
2022 جىلدىڭ قازانىندا «كۋرسيۆ» Freedom Holding «فريدوم فينانس» ينۆەستيسيالىق كومپانياسىن جانە «فريدوم فينانس» بانكى» جشق-سىن «فريدوم فينانس» ينۆەستيسيالىق كومپانياسىنىڭ بۇرىنعى باس ديرەكتورىنىڭ ورىنباسارى جانە ديرەكتورلار كەڭەسىنىڭ مۇشەسى ماكسيم پوۆاليشينگە ساتقانىن حابارلاعان. حولدينگ رەسەيلىك اكتيۆتەردەن شىققان.
Freedom Holding باس ديرەكتورى تيمۋر تۋرلوۆ 2022 جىلى اقش رەزيدەنتتەرىنە رەسەيگە كەز كەلگەن ينۆەستيسيا سالۋعا تىيىم سالىنعاندىقتان، رەسەيلىك بيزنەستى امەريكاندىق حولدينگ ىشىندە ساقتاۋ مۇمكىندىگىن كورمەيتىنىن ايتقان.
Freedom Holding Corp. — اقش-تىڭ نەۆادا شتاتىندا تىركەلگەن حالىقارالىق قارجى توبى. توپتىڭ نەگىزگى نارىعى قازاقستان بولىپ قالا بەرەدى، شتاب-پاتەرى الماتىدا ورنالاسقان. حولدينگ بروكەرلىك، بانكتىك، ساقتاندىرۋ جانە تولەم بيزنەسىن، سونداي-اق تەلەكوممۋنيكاسيالىق، مەديالىق جانە باسقا دا سيفرلىق سەرۆيستەردى دامىتىپ كەلەدى. Freedom Holding Corp. اكسيالارى Nasdaq-تا FRHC تيكەرىمەن، سونداي-اق قازاقستان قور بيرجاسىندا (KASE) جانە Astana حالىقارالىق بيرجاسىندا (AIX) ساۋدالانادى.