حالىقارالىق Digital Bridge فورۋمى قارساڭىندا «فريدوم بانك كازاحستان» اق (Freedom Bank) مەن قازاقستان رەسپۋبليكاسىنىڭ قارجى مونيتورينگى اگەنتتىگى (قما) بىرلەسكەن كەيس ۇسىندى. بۇل جوبا قما ادىستەمەسى مەن Freedom Bankء-تىڭ AI-Compliance پلاتفورماسىن بىرىكتىرۋ ارقىلى دروپتارعا قارسى كۇرەسكە ارنالعان، دەپ حابارلايدى infohub.kz سايتى.
قازاقستان پرەزيدەنتى قاسىم-جومارت توقايەۆ ءوز سوزدەرىندە ەلىمىزدىڭ قارجى سەكتورىندا قاۋىپسىزدىك شارالارىن كۇشەيتىپ، الاياقتىقتىڭ الدىن الۋدىڭ ماڭىزدىلىعىن بىرنەشە رەت اتاپ ءوتتى. ول كاپيتالدىڭ زاڭسىز كەتۋى مەملەكەتتىڭ ەكونوميكالىق قاۋىپسىزدىگىنە تىكەلەي قاتەر توندىرەتىنىن ايتتى.
AI-Compliance سيفرلىق شەشىمى ىسكە قوسىلىپ، وعان قما-نىڭ ادىستەمەلىك نەگىزى ەنگىزىلگەننەن كەيىن Freedom Bank دروپتار جەلىسىن قىسقا مەرزىمدە انىقتايتىن بولدى. بۇگىندە Freedom مەن قما بىرلەسكەن جۇمىسىنىڭ ناتيجەسىندە جەتى ءتۇرلى قۇقىققا قارسى ارەكەت بويىنشا 7 مىڭنان استام ادام انىقتالىپ، بۇعاتتالدى. ولاردىڭ قاتارىندا زاڭسىز ويىن بيزنەسى، الاياقتىق جانە ەسىرتكىنىڭ زاڭسىز اينالىمى بار.
«بۇل — بانكتىڭ ىشكى تەحنولوگيالىق جوباسى عانا ەمەس. ءبىز زارداپ شەككەندەردىڭ اقشاسى كريپتوۆاليۋتادا ءبىرجولا جوعالىپ كەتپەي تۇرىپ، سحەمانى توقتاتۋعا باعىتتالعان جۇيە قۇردىق. قما-مەن بىرلەسكەن جۇمىسىمىزدىڭ ناتيجەسىن ناقتى كەيستەردەن كورىپ وتىرمىز»، — دەپ اتاپ ءوتتى Freedom Holding Corp. باس اتقارۋشى ديرەكتورى تيمۋر تۋرلوۆ.
جوبانى ىسكە اسىرۋ بارىسىندا نەگىزگى ماقسات — دەرەكتەردى وڭدەۋ جىلدامدىعى مەن اۋقىمى ادامداردى الاياقتاردان ناقتى قورعايتىن پرەسەدەنتتەر جاساۋ بولدى. كۇش-جىگەردى بىرىكتىرۋدىڭ، ناقتى ادىستەمە مەن تەحنولوگيالاردىڭ تابىستى كەيسى ەلدەگى قارجىلىق قىلمىستارمەن كۇرەسۋدىڭ لوگيكاسىن وزگەرتىپ وتىر.
«باستى قيىندىق كۇدىكتى وپەراسيالاردى تابۋدا ەمەس ەدى — نارىقتا مۇنداي شەشىمدەر جەتكىلىكتى. قيىندىق جىلدامدىقتا بولدى: بۇرىن دروپتاردى انىقتاۋ ايلارعا سوزىلىپ، ءبىر كەيستى قولمەن تالداۋ شامامەن بەس ساعات ۋاقىت الاتىن. ءبىز دالدىكتى جوعالتپاي، ۋاقىتتى مينۋتقا قىسقارتۋدى ماقسات ەتتىك. ناتيجەسىندە پلاتفورما ءاربىر كۇدىكتى كەيس بويىنشا ماتەريالداردى ءوزى دايىندايدى، ءبىراق شەشىمدى ءارقاشان كومپلاەنس-وفيسەر قابىلدايدى. جاساندى ينتەللەكت مۇندا ادامدى الماستىرمايدى، كەرىسىنشە سول ۋاقىت ىشىندە بىرنەشە ەسە كوپ كەيستى وڭدەۋگە مۇمكىندىك بەرەدى»، — دەدى Freedom Bank ديرەكتورلار كەڭەسىنىڭ مۇشەسى ايدوس جۇماعۇلوۆ.
ەسكە سالايىق، بيىلعى ماۋسىمدا تيمۋر تۋرلوۆ جانات ەليمانوۆپەن كەزدەسۋدە ق ر قما مەن Freedom Holding Corp. اراسىنداعى ىنتىماقتاستىق تۋرالى مەموراندۋمعا قول قويعان بولاتىن. قۇجات قارجىلىق مونيتورينگتىڭ سيفرلىق قۇرالدارىن جەتىلدىرۋ، اناليتيكا مەن تاۋەكەلگە باعدارلانعان تاسىلدەردى دامىتۋ، زاماناۋي RegTech شەشىمدەرىن ەنگىزۋ، سونداي-اق وسى سالاداعى مامانداردىڭ بىلىكتىلىگىن ارتتىرۋعا باعىتتالعان ءبىلىم بەرۋ جانە ساراپتامالىق باستامالاردى جۇزەگە اسىرۋ بويىنشا بىرلەسكەن جۇمىستى كوزدەيدى.
انىقتاما: دروپتار — قىلمىستىق جولمەن الىنعان قاراجاتتى شىعارۋ ءۇشىن ءوز بانك كارتالارىن بەرەتىن ادامدار.