ماكماستەر ۋنيۆەرسيتەتىنىڭ عالىمدارى GDF15 قانىقتىرۋ گورمونى باۋىردىڭ يممۋندىق جاسۋشالارىن قورعانىس رەجيمىنە اۋىستىرىپ، سيرروزدىڭ دامۋىن باياۋلاتا الاتىنىن انىقتادى. بۇل پروسەسس كالوريا ەسەپتەۋمەن نەمەسە مامىر جوعالتۋمەن بايلانىستى ەمەس، دەپ حابارلايدى infohub.kz سايتى.
Cell Metabolism جۋرنالىندا جاريالانعان زەرتتەۋ ناتيجەلەرى GDF15 باۋىر قابىنۋىن باسىپ، ورگاننىڭ تىرتىقتانۋىنىڭ دامۋىن سالماق جوعالتۋعا قاراماستان باياۋلاتا الاتىنىن كورسەتەدى.
«ءبىز GDF15 مي مەن باۋىر اراسىنداعى تابيعي سيگنال جولىن بەلسەندىرەتىنىن انىقتادىق، بۇل باۋىر قابىنۋىن باسۋعا جانە فيبروزدى ازايتۋعا كومەكتەسەدى. بۇل گورمون تۋرالى تۇسىنىگىمىزدى وزگەرتەدى جانە ونىڭ اعزانىڭ سوزىلمالى باۋىر زاقىمدانۋىنا قارسى مەنشىكتى قورعانىس جۇيەسىنىڭ بولىگى بولۋى مۇمكىن ەكەنىن كورسەتەدى»، — دەيدى مەتابوليزم، سەمىزدىك جانە قانت ديابەتى زەرتتەۋ ورتالىعىنىڭ (MODR) تەڭ ديرەكتورى، زەرتتەۋدىڭ اعا اۆتورى گرەگوري ستەينبەرگ.
اۋىر باۋىر اۋرۋى (MASH) بار، ادام اۋرۋىنا ۇقساس زەرتحانالىق تىشقاندارمەن جۇرگىزىلگەن تاجىريبە بارىسىندا GDF15 اقۋىزى ميعا سيگنال جىبەرەتىنى، ول جۇيكە جۇيەسى ارقىلى قورعانىش گليۋكوكورتيكويدتاردىڭ ءوندىرىلۋىن بەلسەندىرەتىنى انىقتالدى.
«گليۋكوكورتيكويدتار باۋىرداعى قابىنۋدى باسۋعا كومەكتەستى، جانە بۇل قورعانىس اسەرلەرى تاماق قابىلداۋداعى، دەنە سالماعىنداعى نەمەسە باۋىرداعى مامىر مولشەرىندەگى وزگەرىستەرگە قاراماستان كورىندى. سونداي-اق، GDF15 باۋىر فيبروزىنىڭ — اۋرۋدىڭ اسقىنعان ساتىسىمەن بايلانىستى تىرتىق ءتىنىنىڭ جينالۋىنىڭ — دامۋىن شەكتەۋگە كومەكتەسەتىنى انىقتالدى»، — دەپ اتاپ ءوتتى زەرتتەۋ اۆتورلارى.
2023 جىلى جاريالانعان الدىڭعى زەرتتەۋ GDF15 سالماق جوعالتۋ كەزىندە كالوريالاردى جاعۋدى قولدايتىنىن كورسەتكەن بولاتىن، الايدا جاڭا جۇمىس بۇل گورموننىڭ باسقا ءرولىن اشادى: بۇرىن بەلگىسىز قابىنۋعا قارسى مەحانيزم ارقىلى باۋىردى قورعاۋ.
زەرتتەۋشىلەردىڭ پىكىرىنشە، بۇل ناتيجەلەر باۋىر قابىنۋىمەن كۇرەسۋگە باعىتتالعان بولاشاق ەمدەۋ ادىستەرىن ازىرلەۋگە كومەكتەسۋى مۇمكىن، بۇل اۋرۋدىڭ دامۋىنىڭ نەگىزگى سەبەبى بولىپ تابىلادى جانە ءالى كۇنگە دەيىن تەراپياعا قيىن.