قىتايدا Geely Galaxy E5 كروسسوۆەرىنىڭ جاڭارتىلعان نۇسقاسى ساتىلىمعا شىقتى. حالىقارالىق نارىقتاردا ول Geely EX5 دەگەن اتپەن تانىمال. كولىك ارتقى جەتەك، 800 ۆولتتىق ارحيتەكتۋرا، 6C قۋاتتاۋ جۇيەسى جانە قۋاتى 329 ا.ك. ەلەكتر قوزعالتقىشىمەن جابدىقتالعان، دەپ حابارلايدى infohub.kz سايتى.
جاڭا مودەل بەس نۇسقادا ۇسىنىلدى. قىتايداعى باعاسى 97،8 مىڭ يۋاننان باستالادى، ەڭ قىمبات كومپلەكتاسياسى 137،8 مىڭ يۋان تۇرادى. 530km Global Classic نۇسقاسى — 97،8 مىڭ يۋان (6،5 ملن تەڭگە)، 550km Smart Charging Voyage — 107،8 مىڭ يۋان (7،2 ملن تەڭگە)، 550km Smart Charging Exploration — 115،8 مىڭ يۋان (7،7 ملن تەڭگە)، 635km Smart Charging Exploration+ — 125،8 مىڭ يۋان (8،4 ملن تەڭگە)، ال توپتىق 635km Smart Charging LiDAR — 137،8 مىڭ يۋان (9،2 ملن تەڭگە).
قىمباتىراق ءتورت نۇسقا 800 ۆولتتىق ارحيتەكتۋراعا كوشىپ، ارتقى وستە ورنالاسقان قۋاتى 245 كۆت (329 ا.ك.) ەلەكتر قوزعالتقىشىن الدى. بۇل الدىڭعى نۇسقامەن سالىستىرعاندا 114 ا.ك. ارتىق. بازالىق EX5 الدىڭعى جەتەكتى، 400 ۆولتتىق جۇيە مەن قۋاتى 160 كۆت (215 ا.ك.) قوزعالتقىشتى ساقتاپ قالدى.
باتارەيا سىيىمدىلىعى 60،22، 61،52 نەمەسە 70،01 كۆت·ساع قۇرايدى. قىتايدىڭ CLTC سيكلى بويىنشا ءجۇرىس قورى 530، 550 جانە 635 كم دەپ مالىمدەلگەن. جىلدام قۋاتتالاتىن نۇسقالار 6C تەحنولوگياسىن پايدالانادى. باتارەيانى 10%-دان 80%-عا دەيىن شامامەن توعىز مينۋتتا قۋاتتاۋعا بولادى.
توپتىق Geely EX5 العاش رەت شاتىرداعى ليدارمەن جانە G-Pilot H5 ينتەللەكتۋالدى جۇرگىزۋ جۇيەسىمەن جابدىقتالدى. ونىڭ مۇمكىندىكتەرى قاتارىندا قالالىق جانە قالا سىرتىنداعى جولداردا اۆتوپيلوت كومەگىمەن ناۆيگاسيالاۋ، اۆتوماتتى تۇراقتاۋ جانە جۇرگىزۋشىگە كومەكتەسەتىن باسقا دا فۋنكسيالار بار.
سالوندا دياگونالى 15،4 ديۋيم، اجىراتىمدىلىعى 2،5K ورتالىق ەكران جانە 10،2 ديۋيمدىك سيفرلىق اسپاپتار تاقتاسى ورناتىلعان. سونداي-اق پروەكسيالىق ديسپلەي، قۋاتى 50 ۆت سىمسىز سمارتفون قۋاتتاعىشى جانە Flyme Auto 2 جۇيەسى قاراستىرىلعان. كروسسوۆەر بۇرىنعى EX5-تە بولماعان كولەمى 160 ليتر الدىڭعى جۇكسالعىشقا يە بولدى.
قازاقستان نارىعىندا Geely Galaxy EX5 ازىرگە PRO جانە MAX نۇسقالارىندا ۇسىنىلىپ وتىر. باعاسى 13،9 ملن تەڭگەدەن باستالادى. ەكى كومپلەكتاسيا دا الدىڭعى جەتەكپەن جانە 218 ا.ك. ەلەكتر قوزعالتقىشىمەن جابدىقتالعان، باتارەيا سىيىمدىلىعى 60،2 كۆت·ساع قۇرايدى.
قازاقستاندىق EX5-تەردىڭ ءجۇرىس قورى WLTP سيكلى بويىنشا 430 كم-گە جەتەدى. 100 كم/ساع جىلدامدىققا دەيىن ۇدەۋ 6،9 سەكۋند الادى، ال 10%-دان 80%-عا دەيىن جىلدام قۋاتتاۋ 28 مينۋتقا سوزىلادى.
وسىلايشا، قىتايدا جاڭارتىلعان EX5 قازاقستاندا قولجەتىمدى مودەلدەن ايتارلىقتاي ەرەكشەلەنەدى. جاڭا نۇسقالار جەرگىلىكتى ديلەرلەرگە قاشان جەتەتىنى ازىرگە بەلگىسىز.
بۇعان دەيىن كۋرسيۆ اۆتو Geely كومپانياسى قىتايدا جاڭا Preface L Plus ساتىلىمىن باستاعانىن حابارلاعان بولاتىن.