امەريكالىق General Atlantic ينۆەستيسيالىق كومپانياسى ەكىباستۇزداعى «دسو اڭعارى» جوباسىنا قاتىسۋعا ناقتى قىزىعۋشىلىق ءبىلدىردى. بۇل باستامانىڭ جۇزەگە اسۋ بارىسىن قازاقستان پرەزيدەنتى قاسىم-جومارت توقايەۆ پەن General Atlantic ءتوراعاسى ءارى باس ديرەكتورى ۋيليام فورد تالقىلادى، دەپ حابارلايدى infohub.kz سايتى.
اقوردانىڭ مالىمەتىنشە، جوبا جاساندى ينتەللەكت، بۇلتتىق ەسەپتەۋلەر جانە سيفرلىق سەرۆيستەر ءۇشىن اۋقىمدى ينفراقۇرىلىمدىق پلاتفورما قۇرۋعا باعىتتالعان.
كەزدەسۋ بارىسىندا تاراپتار ينۆەستيسيالىق ىنتىماقتاستىقتىڭ، سونداي-اق قازاقستانداعى تەحنولوگيالىق سەكتور مەن جاساندى ينتەللەكت ەكوجۇيەسىن دامىتۋدىڭ پەرسپەكتيۆالارىن قاراستىردى. قاسىم-جومارت توقايەۆ جاساندى ينتەللەكت پەن سيفرلىق ترانسفورماسيانى ەلدىڭ باستى باسىمدىقتارىنىڭ ءبىرى دەپ اتاپ، جاڭا جوبالارعا الەمنىڭ جەتەكشى ينۆەستورلارى مەن تەحنولوگيالىق كومپانيالارىن تارتۋدىڭ ماڭىزدىلىعىن اتاپ ءوتتى.
پرەزيدەنت Astana Hub، Alem.ai حالىقارالىق جاساندى ينتەللەكت ورتالىعى جانە Qazaq AI Research University بىرىكتىرەتىن تەحنولوگيالىق ەكوجۇيەنىڭ قالىپتاسۋى تۋرالى ايتتى. ونىڭ ايتۋىنشا، ونىڭ دامۋى الەمدىك نارىقتا باسەكەگە قابىلەتتى كومپانيالاردىڭ، سونىڭ ىشىندە Higgsfield AI-دىڭ پايدا بولۋىنا ىقپال ەتەدى.
ۋيليام فورد ءوز كەزەگىندە General Atlantic-تىڭ فينتەح، ەلەكتروندىق كوممەرسيا، باعدارلامالىق جاساقتاما جانە جاساندى ينتەللەكت سالالارىنداعى، سونداي-اق ەنەرگەتيكالىق جانە سيفرلىق ينفراقۇرىلىمداعى جىلدام ءوسىپ كەلە جاتقان كومپانيالارعا ينۆەستيسيالاۋ مۇمكىندىكتەرىن تانىستىردى.
بۇعان دەيىن «كۋرسيۆ» NVIDIA ەكىباستۇزداعى «دسو اڭعارىنىڭ» كەلەسى كەزەڭىنە قاتىسۋدى جوسپارلاپ وتىرعانىن جازعان. جوبا قۋاتى شامامەن 300 مۆت، كەڭەيتۋ مۇمكىندىگى 1 گۆت-قا دەيىنگى ينفراقۇرىلىمدى كوزدەيدى. قازاقستاندا NVIDIA تەحنولوگيالارىنا نەگىزدەلگەن ەكى سۋپەركومپيۋتەرلىك كلاستەر ىسكە قوسىلعان.
سونىمەن قاتار، AI & Digital Bridge 2026 كورمەسىندە قاسىم-جومارت توقاەۆقا Qazaq AI Research University بازاسىنداعى AI-Enabled University مودەلى، Trusted Kazakhstan جانە ALFA جوبالارى، Aitu-دىڭ جاڭا فۋنكسيالارى، سونداي-اق «سامۇرىق-قازىنا» مەن Higgsfield.ai-دىڭ ينتەللەكتۋالدى شەشىمدەرى تانىستىرىلدى.