2026 جىلدىڭ باسىنان بەرى گەرمانيادا قاتتى ىستىقتىڭ سالدارىنان 14 مىڭ ادام قازا تاپتى، ولاردىڭ اراسىندا ايەلدەر ءجيى كەزدەسەدى، دەپ حابارلايدى infohub.kz سايتى.
روبەرت كوح ينستيتۋتىنىڭ (RKI) رەسمي سايتىندا جاريالانعان دەرەكتەرگە سايكەس، 20 تامىزداعى جاعداي بويىنشا ىستىققا بايلانىستى قازا تاپقانداردىڭ بولجامدى سانى 14 مىڭعا جەتتى. ءولىمنىڭ ەڭ كوپ ۇلەسى 85 جاستان اسقان ادامدارعا تيەسىلى.
روبەرت كوح ينستيتۋتى جاز بويى فەدەرالدىق ستاتيستيكالىق ۆەدومستۆونىڭ (Destatis) دەرەكتەرىمەن قاتار ىستىققا بايلانىستى ولىم-جىتىمگە اپتا سايىن مونيتورينگ جۇرگىزەدى. ءولىم سانىن باعالاۋ ماتەماتيكالىق ءادىس ارقىلى جۇزەگە اسىرىلادى، ويتكەنى ىستىق مەديسينالىق قورىتىندىلاردا ءولىمنىڭ تىكەلەي سەبەبى رەتىندە سيرەك كورسەتىلەدى، ءبىراق سوزىلمالى اۋرۋلاردى ورشىتەدى. عالىمدار وتكەن جىلدارداعى ورتاشا ءولىم دەڭگەيىن ىستىق تولقىندار كەزىندەگى كورسەتكىشتەرمەن سالىستىرادى، ال نورمادان اسىپ كەتۋدى اۋا رايى جاعدايلارىمەن بايلانىستىرادى.
بۇعان دەيىن 2026 جىلدىڭ باسىنان بەرى گەرمانيادا ىستىق 10 مىڭعا جۋىق ادامنىڭ ءومىرىن قيعانى حابارلانعان بولاتىن، بۇل سوڭعى ون جىلداعى ەڭ جوعارى كورسەتكىش بولدى.