قارجى نارىعىن رەتتەۋ جانە دامىتۋ اگەنتتىگى حەنك يان حۋگەندورننىڭ كانديداتۋراسىن Halyk Bankء-تىڭ تاۋەلسىز ديرەكتورى جانە باسقارۋ ورگانىنىڭ مۇشەسى لاۋازىمىنا ماقۇلدادى. شەشىم 2026 جىلعى 24 شىلدەدە قابىلداندى، دەپ حابارلايدى infohub.kz سايتى.
حۋگەندورن – نيدەرلاند ازاماتى، دوحادا (قاتار) تۇرادى. ول قاتار قارجى ورتالىعىنىڭ (Qatar Financial Centre) قارجىلىق قىزمەتتەر جونىندەگى ديرەكتورى لاۋازىمىن اتقارادى، وندا شەتەلدىك ينۆەستيسيالاردى، سونداي-اق بانكتەردى، ينۆەستيسيالىق كومپانيالاردى، تىكەلەي جانە ۆەنچۋرلىق ينۆەستيسيالار قورلارىن جانە باسقا دا قارجى ۇيىمدارىن تارتۋعا جاۋاپتى.
جاڭا تاۋەلسىز ديرەكتور حالىقارالىق قارجى سەكتورىندا 30 جىلدان استام تاجىريبەگە يە. بۇرىن ول نيدەرلاند پەن تاياۋ شىعىس ەلدەرىندەگى ABN AMRO Bank جانە Deutsche Bank-تە باسشىلىق قىزمەتتەر اتقاردى، سونداي-اق Mashreq Qatar-دىڭ باس ديرەكتورى بولدى. Deutsche Bank-تە ساقتاندىرۋ كومپانيالارى، زەينەتاقى قورلارى، فينتەح كومپانيالارىن قوسا العاندا، بانكتىك ەمەس قارجى ينستيتۋتتارىمەن جۇمىس باعىتىن باسقاردى جانە بانكتىڭ ەۋروپاداعى ستراتەگيالىق جانە بيزنەس جوسپارلارىن ىسكە اسىرۋعا جاۋاپتى بولدى.
حۋگەندورن نيدەرلاندتاعى ۋترەحت ۋنيۆەرسيتەتىن ءبىتىرىپ، زاڭ عىلىمدارىنىڭ ماگيسترى دارەجەسىن الدى. سونداي-اق ول London Business School جانە INSEAD-تە باسشىلارعا ارنالعان باعدارلامالاردان ءوتتى. ول Wahed Inc ديرەكتورلار كەڭەسىنىڭ مۇشەسى جانە Qazaqstan Investment Corporation ديرەكتورلار كەڭەسىنىڭ قۇرامىنا كىرەدى.
ۇلتتىق بانكتىڭ 2026 جىلعى 1 ماۋسىمداعى دەرەكتەرى بويىنشا Halyk Bank اكتيۆتەرى بويىنشا قازاقستانداعى ەڭ ءىرى بانك بولىپ تابىلادى – 20،97 ترلن تەڭگە. بۇعان دەيىن بانك اكسيونەرلەرى 20 تامىزدا ديۆيدەندتەر تولەۋ ماسەلەسىن شەشۋ ءۇشىن جينالاتىنى حابارلانعان بولاتىن. ديرەكتورلار كەڭەسى 2025 جىل ءۇشىن ديۆيدەندتەرگە 306،6 ملرد تەڭگە باعىتتاۋدى ۇسىنىپ وتىر.