قازاقستان ۇلتتىق وليمپيادالىق كوميتەتىنىڭ ءتوراعاسى ءارى World Boxing حالىقارالىق فەدەراسياسىنىڭ پرەزيدەنتى گەننادي گولوۆكين ۋكرايندىق «ميروتۆورەس» سايتىنىڭ دەرەكقورىنا ەنگىزىلدى. اتاقتى قازاقستاندىق بوكسشىنىڭ ءپروفيلى رەسۋرستا 15 تامىزدا پايدا بولدى، دەپ حابارلايدى infohub.kz.
سايت ۇيىمداستىرۋشىلارى World Boxing باسشىسىن «رەسەيلىك اگرەسسيانى اشىق قولدادى» دەپ ايىپتادى. بۇعان فەدەراسيانىڭ باسقارۋ ورگانىنىڭ رەسەيلىك جانە بەلارۋستىك سپورتشىلارعا قاتىستى بارلىق شەكتەۋلەردى تولىق الىپ تاستاۋ تۋرالى شەشىمى سەبەپ بولدى.
بيىلعى شىلدەدە World Boxing ۇيىمى رەسەي مەن بەلارۋس بوكسشىلارىنا بارلىق جاستاعى حالىقارالىق تۋرنيرلەرگە ءوز ەلدەرىنىڭ رامىزدەرىمەن قاتىسۋعا رۇقسات بەردى. ەسكە سالايىق، ءدال وسى حالىقارالىق قۇرىلىم وليمپيادالىق بوكستى باسقارادى جانە 2028 جىلعى وليمپيادا ويىندارىنا ىرىكتەۋ جارىستارىن وتكىزەدى.
World Boxing اتقارۋ كوميتەتىنىڭ رەسمي مالىمدەمەسىندە رەسەيلىك سپورتشىلار باسقا ەلدەردىڭ بوكسشىلارىمەن تەڭ دارەجەدە جارىستارعا قاتىساتىنى، الايدا ۇيىم ولاردىڭ مىنەز-قۇلقى مەن انتيدوپينگتىك حاتتامالاردىڭ ساقتالۋىن قاتاڭ باقىلاۋدى جالعاستىراتىنى اتاپ ءوتىلدى.
««ميروتۆورەس» ورتالىعى قۇقىق قورعاۋ ورگاندارىنان سايتتاعى بۇل جاريالانىمدى ازاماتتىڭ ۋكراينانىڭ ۇلتتىق قاۋىپسىزدىگىنە، بەيبىتشىلىككە، ادامزات قاۋىپسىزدىگىنە جانە حالىقارالىق قۇقىقتىق تارتىپكە قارسى سانالى ارەكەتتەر جاساعانى تۋرالى مالىمدەمە رەتىندە قاراستىرۋدى سۇرايدى»، — دەلىنگەن گولوۆكيننىڭ ۋكرايندىق رەسۋرستاعى كارتوچكاسىندا.
سپورتشىلاردى قايتارۋ پروسەسى كوكتەمدە باستالعان ەدى. ناۋرىزدا World Boxing اتقارۋ كەڭەسى رەسەي مەن بەلارۋس بوكس فەدەراسيالارىنىڭ ۇيىمعا كىرۋ تۋرالى وتىنىمدەرىن ماقۇلداپ، سودان كەيىن سپورتشىلاردى قابىلداۋ شارتتارى بويىنشا تۇسىنىكتەمە الۋ ءۇشىن حالىقارالىق وليمپيادالىق كوميتەتكە (حوك) سۇراۋ جىبەردى.
گەننادي گولوۆكين World Boxingء-تى 2025 جىلعى 23 قاراشادان باستاپ باسقارادى. جاريالانىم كەزىندە بوكسشىنىڭ وزىنەن، قازاقستان ۇوك-نەن نەمەسە World Boxing وكىلدىگىنەن «ميروتۆورەس» بازاسىنا ەنگىزىلۋىنە قاتىستى رەسمي تۇسىنىكتەمەلەر تۇسكەن جوق.
«ميروتۆورەس» — 2014 جىلى قۇرىلعان ۋكرايندىق ينتەرنەت-رەسۋرس، ول بەلسەندىلەر ۋكراينانىڭ ۇلتتىق قاۋىپسىزدىگىنە ءقاۋىپ رەتىندە باعالايتىن ادامدار تۋرالى مالىمەتتەردى ەنگىزەتىن بەيرەسمي جۇرتشىلىق دەرەكقورى بولىپ تابىلادى. پورتالدا جوبا اۆتورلارىنىڭ نارازىلىعىن تۋدىرعان بۇكىل الەمدەگى قوعام قايراتكەرلەرىنىڭ، ساياساتكەرلەردىڭ، جۋرناليستەردىڭ جانە سپورتشىلاردىڭ جەكە دەرەكتەرى جاريالانادى. ءبىرقاتار ەلدەردىڭ بيلىگى مەن حالىقارالىق قۇقىق قورعاۋ ۇيىمدارى سايتتى جەكە دەرەكتەردى جاريالاعانى جانە قۇقىقتىق اشىقتىقتىڭ جوقتىعى ءۇشىن بىرنەشە رەت سىنعا الدى.