Google كومپانياسىنىڭ Gemini جاساندى ينتەللەكتى Irregular كومپانياسىنىڭ كيبەرتەستى بارىسىندا كەزدەيسوق ينتەرنەتكە قوسىلىپ، ءۇش بوگدە ۇيىمنىڭ سەرۆەرلەرىن بۇزدى، دەپ حابارلايدى infohub.kz سايتى.
Google كومپانياسى 2026 جىلدىڭ مامىرىندا Irregular دەگەن بوگدە فيرما قاتىسقان كيبەرقاۋىپسىزدىك تەستىلەۋى كەزىندە بولعان وقيعانى رەسمي تۇردە راستادى. «Capture the Flag» سيمۋلياسياسى اياسىندا Gemini مودەلدەرىنە ويدان شىعارىلعان كومپانيانىڭ دەرەكتەرىن الۋ تاپسىرىلدى. باپتاۋلارداعى قاتەلىك سالدارىنان تەستىلىك ورتا ينتەرنەتتەن وقشاۋلانباي قالدى، ال ويدان شىعارىلعان فيرمانىڭ اتاۋى ناقتى بار ۇيىمنىڭ اتاۋىمەن سايكەسىپ كەتتى.
سوڭىنان جاساندى ينتەللەكت اشىق جەلىگە شىعىپ، ناقتى سەرۆەرلەرگە شابۋىل جاسادى. ءبىر جاعدايدا Gemini پارولدەردى ىرىكتەۋ ارقىلى جۇيەگە كىرۋگە قول جەتكىزسە، قالعان ەكەۋىندە اشىق كود قويمالارىنان تابىلعان تىركەلگى دەرەكتەرىن پايدالاندى. Google ناقتىلاعانداي، مودەل ناقتى بيزنەستىڭ ينفراقۇرىلىمىمەن جۇمىس ىستەپ جاتقانىن تۇسىنگەن بويدا ارەكەتىن ءوز بەتىنشە توقتاتتى جانە قۇپيا اقپاراتتى الىپ ۇلگەرمەدى نە وعان زيان كەلتىرمەدى.
Google كومپانياسىنىڭ اقپاراتتىق قاۋىپسىزدىك جونىندەگى اتقارۋشى ۆيسە-پرەزيدەنتى حيزەر ەدكينس وقيعا مودەلدى وقىتۋداعى اقاۋلىقتى ەمەس، جاساندى ينتەللەكتتىڭ قورعانىس تەتىكتەرىنىڭ دۇرىس جۇمىس ىستەگەنىن كورسەتەتىنىن مالىمدەدى. Irregular كومپانياسى ازىرلەۋشىلەرگە بولعان جايت تۋرالى شىلدەنىڭ سوڭىندا حابارلاپ، تەستىلىك ينفراقۇرىلىمداعى وسالدىقتاردى جويدى. بۇعان دەيىن Irregular تەكسەرۋلەرى اياسىندا نەيروجەلىلەردىڭ ينتەرنەتكە وسىعان ۇقساس جوسپاردان تىس شىعۋى تۋرالى OpenAI، Anthropic جانە Meta كومپانيالارى دا حابارلاعان بولاتىن.