قازاقستاننىڭ عىلىم جانە جوعارى ءبىلىم مينيسترلىگى قازاق ءتىلىن ۇيرەتۋگە ارنالعان Steppe Rider ويىنىنىڭ ازىرلەۋشىلەرىنە قاتىستى تەكسەرۋ باستادى. ويىننىڭ قۇنى 241 ملن تەڭگەنى قۇراعان. ۆەدومستۆو ۇلتتىق قاۋىپسىزدىك كوميتەتىنە جانە استانا قالاسىنىڭ ەكونوميكالىق تەرگەۋ دەپارتامەنتىنە سۇراۋ سالدى، دەپ حابارلايدى infohub.kz سايتى.
ۇكىمەتتەگى بريفينگتە عىلىم جانە جوعارى ءبىلىم ءمينيسترى ساياسات نۇربەك ءوز ۆەدومستۆوسىنىڭ قۇقىق قورعاۋ ورگاندارىنا ءتيىستى سۇراۋلارمەن ءوزى جۇگىنگەنىن راستادى. «ءقازىر تەرگەۋ شارالارى جۇرگىزىلۋدە. كەيىن قانداي دا ءبىر شەشىمدەر جاريالانادى: نە سوت فورماتىندا، نە اكىمشىلىك قۇقىقبۇزۋشىلىق اياسىندا. ەندى بۇل تەكسەرۋشى ورگانداردىڭ ءىسى»، — دەدى ول.
سونىمەن قاتار، مينيسترلىكتىڭ وزىندە دە ىشكى تەكسەرۋلەر جۇرگىزىلۋدە.
ەسكە سالايىق، جوبانىڭ تاپسىرىس بەرۋشىسى عىلىم جانە جوعارى ءبىلىم مينيسترلىگى بولدى. ويىن اشىق قولجەتىمدىلىككە شىققاننان كەيىن قازاقستاندىقتار ونى ساپاسىزدىعى ءۇشىن سىنعا الدى: پايدالانۋشىلار ەسكىرگەن گرافيكانى، كوپتەگەن باگتار مەن كەمشىلىكتەردى اتاپ ءوتتى، بۇل پايدالانۋ اسەرىن بۇزادى.
سىنعا جاۋاپ رەتىندە عىلىم مينيسترلىگى ءتىل ساياساتى كوميتەتىنىڭ ءتوراعاسى ەربول تىلەشوۆ Steppe Rider پيلوتتىق جوبا ەكەنىن ءتۇسىندىرىپ، 2026 جىلعا قاراي ويىن جاڭارتىلىپ، جەتىلدىرىلەتىنىن ۋادە ەتتى.