قازاقستاندىق كوممەرسيالىق تەحنيكا ءوندىرۋشىسى Hyundai Trans Auto بەلارۋسكە 2027–2028 جىلدارى 790 كولىك جەتكىزۋ تۋرالى كەلىسىمگە قول قويدى. كەلىسىمشارت سوماسى كەمىندە 30 ملن دوللاردى قۇرايدى. قۇجات «يننوپروم. بەلارۋس» فورۋمى اياسىندا بەلارۋستىك «ەر سي ەم» جشق-مەن جاسالدى، دەپ حابارلايدى infohub.kz سايتى.
قازاقستاننىڭ ساۋدا جانە ينتەگراسيا مينيسترلىگىنىڭ باعالاۋىنشا، وتاندىق اۆتوكولىك وندىرۋشىلەرىنىڭ بەلارۋس نارىعىنداعى ەكسپورتتىق الەۋەتى جىلىنا 4،5 مىڭ كولىككە جەتەدى.
قازاقستاندىق كومپانيالار وسى باعىتتاعى جەتكىزىلىمدى ۇلعايتۋدى جالعاستىرىپ كەلەدى. 2026 جىلدىڭ قاڭتارىندا مينسكىدە «كازاح ترەيد حاۋس» قازاقستاننىڭ ساۋدا ءۇيى جۇمىسىن باستادى. ونىڭ مىندەتى — وتاندىق ءونىمدى ىلگەرىلەتۋ جانە ەكسپورتتىق جوبالاردى سۇيەمەلدەۋ. جەتكىزۋشىلەر قاتارىنا جىل سايىن بەلارۋسكە 300 مىڭ دوللارعا دەيىنگى سوماعا 20 جۇك كولىگىن جىبەرۋدى جوسپارلاعان سەگىز قازاقستاندىق ءوندىرۋشى ەندى.
سونىمەن قاتار تاراپتار اۆتوموبيل ونەركاسىبىندەگى بىرلەسكەن جوبالاردى تالقىلاپ جاتىر. اتاپ ايتقاندا، «پوجسناب» جشق مەن «اۆتوكومپونەنتى كز» ج ش س ارنايى ءورت ءسوندىرۋ تەحنيكاسىن ءوندىرۋدى ۇيىمداستىرۋدى پىسىقتاۋدا.
قازاقستان مەن بەلارۋس اراسىنداعى تاۋار اينالىمى 2025 جىلدىڭ قورىتىندىسى بويىنشا 30%-عا ءوسىپ، 1،2 ملرد دوللاردان استى. 2026 جىلدىڭ قاڭتار–شىلدەسىندە ءوزارا ساۋدا تاعى 20،5%-عا ارتىپ، 723 ملن دوللارعا جەتتى. بۇل رەتتە قازاقستاننىڭ ەكسپورتى 180،3 ملن دوللاردى، ال يمپورتى 542،7 ملن دوللاردى قۇرادى.
بيلىك جاڭا ونەركاسىپتىك جانە ساۋدا باستامالارى قازاقستاندىق ءونىمنىڭ بەلارۋسكە جەتكىزىلىمىن ۇلعايتۋعا مۇمكىندىك بەرەدى دەپ كۇتىپ وتىر.
بۇعان دەيىن كۋرسيۆ اۆتو 2026 جىلدىڭ قاڭتار–تامىزىندا قازاقستاندىق كاسىپورىندار 126،4 مىڭ اۆتوموبيل جانە باسقا دا تەحنيكا شىعارعانىن حابارلاعان. Hyundai Trans Almaty 837 كوممەرسيالىق جانە ارنايى كولىك، ال Hyundai Trans Kazakhstan 25،1 مىڭ جەڭىل اۆتوموبيل ءوندىردى.