حالىقارالىق فونوگرامما وندىرۋشىلەر فەدەراسياسى (IFPI) ءىرى مۋزىكالىق ديستريبيۋتورلارمەن بىرلەسىپ، اۆتورلاردى، قۇقىق يەلەرىن جانە تىڭدارمانداردى تىڭدالىمدى بۇرمالاۋدان قورعاۋعا باعىتتالعان Streaming Integrity Initiative باستاماسىن ىسكە قوستى، دەپ حابارلايدى infohub.kz سايتى.
Engadget باسىلىمىنىڭ جازۋىنشا، جاساندى ينتەللەكت پەن اۆتوماتتاندىرىلعان جۇيەلەر ارقىلى ستريمدەردى قولدان كوبەيتۋ ناقتى ورىنداۋشىلاردىڭ تابىسىن الاياق مانيپۋلياتورلارعا اعىزىپ جىبەرەدى.
جاڭا جوبا اياسىندا قاتىسۋشىلار بەس نەگىزگى قاعيداتتى ۇستانۋعا مىندەتتەندى. ديستريبيۋتورلار پايدالانۋشىلاردىڭ جەكە باسىن جانە كونتەنتكە قۇقىعىن تەكسەرەتىن قاتاڭ راسىمدەردى ەنگىزىپ، جاساندى ينتەللەكتكە بايلانىستى تاۋەكەلدەردى انىقتايتىن زاماناۋي قۇرالداردى قولدانادى.
سونىمەن قاتار كەلىسىمگە قول قويعان كومپانيالار الاياقتار تۋرالى دەرەكتەرمەن ءبولىسىپ، قورعانىس جۇيەلەرىن ۇنەمى جاڭارتىپ وتىرماق.
باستاماعا Sony Music Group، Universal Music Group جانە Merlin ۇيىمى سياقتى سالالىق الىپتار قوسىلدى. IFPI وكىلدەرى مۋزىكا نارىعىنداعى قالعان ويىنشىلاردى دا قۇجاتقا قول قويۋعا شاقىرىپ، وزگەرىپ وتىراتىن كيبەرقاۋىپتەرگە قارسى ءبىرتۇتاس مايدان قۇرۋعا ۇندەدى.