قازاقستاندا اۆتوشكولالاردىڭ جۇمىس ساپاسى ءالى دە كۇردەلى ماسەلە بولىپ وتىر: وقۋ ورىندارىنىڭ كوبىندە قاجەتتى ماتەريالدىق-تەحنيكالىق بازا جوق، ال وقىتۋشىلار مەن نۇسقاۋشىلاردىڭ بىلىكتىلىگى بەلگىلەنگەن تالاپتارعا ساي ەمەس. بۇل تۋرالى ۇكىمەتتە وتكەن بريفينگتە ىشكى ىستەر ءمينيسترىنىڭ ورىنباسارى يگور لەپەحا مالىمدەدى، دەپ حابارلايدى infohub.kz سايتى.
ءىىم باسشىسىنىڭ ورىنباسارى ايتۋىنشا، اۆتوشكولالاردى باقىلاۋداعى ماڭىزدى قادام — قازاقستاندا جۇرگىزۋشىلەردى ءوز بەتىنشە دايارلاۋعا تىيىم سالىنۋى بولدى. سونىمەن قاتار كۋرستى بىتىرگەنى تۋرالى قاعاز كۋالىكتەرگە دە تىيىم سالىندى — بۇل شارا قۇجاتتاردى بۇرمالاۋدىڭ الدىن الۋعا باعىتتالعان.
«ءقازىر اۆتوماتتاندىرىلعان جۇيە جۇمىس ىستەيدى: ادام اۆتوشكولاعا تۇسكەن بويدا ەسەپكە قويىلادى. سوندىقتان اۆتوشكولا تىڭداۋشىسى بولىپ كەيىننەن تىركەلۋ مۇمكىن ەمەس. بۇل شارالار ناتيجە بەردى. وتكەن جىلى كولىك جۇرگىزۋ ءوتىلى ءبىر جىلعا دەيىنگى جۇرگىزۋشىلەردىڭ كىناسىنەن بولعان جكو سانى 40%-عا ازايدى، بيىل تاعى 7%-عا تومەندەدى»، — دەدى ۆيسە-مينيستر.
ول بولاشاقتا اۆتوشكولالاردى اشۋ كەزەڭىنەن باستاپ ءتارتىپتى باقىلاۋ جوسپارلانىپ وتىرعانىن قوستى.
«وكىنىشكە قاراي، بۇگىندە بەينەلەپ ايتقاندا، تەك بولمەسى، ورىندىعى جانە ءمورى عانا بار كوپتەگەن اۆتوشكولا جۇمىس ىستەپ جاتىر. ولاردا قاجەتتى ماتەريالدىق-تەحنيكالىق بازا جوق، ال وقىتۋشىلار مەن نۇسقاۋشىلاردىڭ بىلىكتىلىگى تالاپتارعا ساي ەمەس. سوندىقتان اۆتوشكولا اشار الدىندا وقىتۋشىلاردىڭ بىلىكتىلىگىن، قاجەتتى وقۋ بازاسىنىڭ جانە كولىكتەردىڭ بار-جوعىن تەكسەرەتىن بولامىز»، — دەدى ءىىم باسشىسىنىڭ ورىنباسارى.
ەسكە سالايىق، بيىل كوكتەمدە قازاقستانداعى اۆتوشكولالاردا ءتارتىپ بۇزۋشىلىقتارعا بايلانىستى 700-دەن استام وقۋ توبىنىڭ دايارلىعى توقتاتىلعان بولاتىن.