ىشكى ىستەر ءمينيسترى ەرجان سادەنوۆ ىشكى ىستەر ورگاندارى قىزمەتكەرلەرىنە ارنالعان جەتوننىڭ جاڭا ۇلگىسىن، سونداي-اق ونى بەرۋ، ساقتاۋ جانە قايتارۋ ءتارتىبىن بەكىتەتىن بۇيرىققا قول قويدى. قۇجات نورماتيۆتىك قۇقىقتىق اكتىلەردىڭ ەتالوندىق باقىلاۋ بانكىنىڭ سايتىندا جاريالانعان، دەپ حابارلايدى infohub.kz.
بۇيرىققا سايكەس، باسشىلىق قۇرامداعى ءاربىر قىزمەتكەرگە ءبىر ءارىپ پەن التى سيفردان تۇراتىن جەكە ءنومىر بەرىلەدى. بۇل ءنومىر قىزمەتكەرگە قىزمەت ەتۋ جانە زاپاسقا شىققانعا دەيىنگى بارلىق كەزەڭدە بەكىتىلەدى. ءنومىر العاشقى ارنايى اتاق بەرىلگەن كەزدە تابىستالاتىن مەتالل جەتونعا ويىلىپ جازىلادى.
جەكە ءنومىر قىزمەتتىك قۇجاتتاردا — كۋالىكتە، كادرلىق قۇجاتتاردا، بۇيرىقتاردا، اقشالاي جانە زاتتاي قامتاماسىز ەتۋ قۇجاتتارىندا، سونداي-اق قىزمەتتىك حات-حابارلاردا قولدانىلادى. قىزمەتكەر باسقا لاۋازىمعا اۋىسقان كەزدە، ەگەر وعان بۇرىن قىزمەت نەمەسە ەسەپكە الۋ ورنى بويىنشا جەكە ءنومىر بەرىلگەن بولسا، ول ساقتالادى.
زاپاسقا نەمەسە وتستاۆكاعا شىققان كەزدە جەتون كادر قىزمەتىنە تاپسىرىلۋى ءتيىس، وندا ول جەكە ىسپەن بىرگە ساقتالادى.
سيپاتتامادا جەتوننىڭ قالىڭدىعى 1،5–2 مم بولاتىن سوپاق ءپىشىندى مەتالل پلاستينكا تۇرىندە جاسالاتىنى كورسەتىلگەن. ۇلكەن ءوسى بويىنشا ولشەمى — 45 مم، كىشى ءوسى بويىنشا — 26 مم. الدىڭعى بەتىندە بويلىق وس بويىمەن شتامپتالعان جولاق بار. جولاقتىڭ ۇستىندە «ۆس رك» دەگەن جازۋ، ال استىندا — سەريا (ورىس الىپبيىندەگى ءارىپ) جانە جەتوننىڭ ءنومىرى ورنالاسقان. وسى جازۋلاردىڭ سول جاعىندا جەتوندى كيىمگە نەمەسە جەكە ىسكە بەكىتۋگە ارنالعان ديامەترى 4 مم تەسىك قاراستىرىلعان.