يلون ماسك اقش پرەزيدەنتى دونالد ترامپ اكىمشىلىگىمەن رەسمي كونسۋلتاتيۆتىك جۇمىسقا قايتا ورالدى: كاسىپكەر پەنتاگوننىڭ بولاشاق سوعىستاردى زەرتتەۋ جوباسىنىڭ جەتەكشىلەرىنىڭ ءبىرى بولادى، دەپ حابارلايدى infohub.kz سايتى.
Project Meridian جوباسىنىڭ باستالعانىن پەنتاگون باسشىسى پيت حەگسەت جاريالادى. ماسكتان بولەك، جوبانى قورعانىس تەحنولوگيالارى كومپانياسى Anduril Industries نەگىزىن قالاۋشى پالمەر لاكي مەن اقش وكىلدەر پالاتاسىنىڭ بۇرىنعى سپيكەرى نيۋت گينگريچ باسقارادى. توپ امەريكاندىق اسكەريلەرگە بولاشاق قاقتىعىستاردا قانداي تەحنولوگيالار مەن قارۋ-جاراق قاجەت بولاتىنىن زەرتتەيدى.
«ءبىز قارسىلاستارىمىزدا جوق امەريكاندىق باسىمدىقتىڭ بىرەگەي كوزىن — يننوۆاتورلارىمىزدى، باسشىلارىمىزدى جانە تەحنولوگيا ماماندارىمىزدى پايدالانامىز»، — دەدى پەنتاگون باسشىسى پيت حەگسەت.
ناتيجەلەردى دايىنداۋعا 120 كۇن بەرىلدى. The Washington Post دەرەگىنشە، ۇسىنىمدار قاڭتاردىڭ سوڭىنا قاراي حەگسەتكە تاپسىرىلۋى ءتيىس. ماسك جوباعا شەكتەۋلى كونسۋلتاتيۆتىك رولدە قاتىسادى.
بۇعان دەيىن ماسك ۇكىمەتتىڭ تيىمدىلىك دەپارتامەنتى DOGE جۇمىسىنا قاتىسىپ، فەدەرالدىق شىعىستار مەن مەملەكەتتىك قىزمەتكەرلەر سانىن قىسقارتۋمەن اينالىسقان. 2025 جىلدىڭ مامىرىندا ول اكىمشىلىكتەن كەتتى.
ماۋسىمدا كاسىپكەر مەن پرەزيدەنت اراسىندا اشىق جانجال تۋىندادى. ماسك ترامپتىڭ سالىقتار مەن شىعىستار تۋرالى زاڭ جوباسىن سىناپ، ونى «جيىركەنىشتى سۇمدىق» دەپ اتادى. ونىڭ پىكىرىنشە، قۇجات بيۋدجەت تاپشىلىعىن ۇلعايتىپ، مەملەكەتتىك قاراجاتتى ۇنەمدەۋ جۇمىستارىنا نۇقسان كەلتىردى. ترامپ بولسا، ماسكتىڭ كومپانيالارىنا مەملەكەتتىك كەلىسىمشارتتار مەن سۋبسيديالاردى توقتاتۋعا ءقاۋىپ ءتوندىردى. كاسىپكەر پرەزيدەنتتى يمپيچمەنتكە شاقىرۋدى قولدادى. كەيىنىرەك ماسك كەيبىر مالىمدەمەلەرى شەكتەن شىققانىن مويىندادى.
كەيىن ماسك پەن ترامپ تاتۋلاستى. وسى اپتادا كاسىپكەر اق ۇيدە پرەزيدەنتتىڭ جاساندى ينتەللەكت قاۋىپسىزدىگىنە ارنالعان تەحنولوگيالىق كومپانيا باسشىلارىمەن كەزدەسۋىنە قاتىستى. Project Meridian-عا قاتىسۋ ونىڭ جانجالدان كەيىنگى اكىمشىلىكپەن رەسمي كونسۋلتاتيۆتىك جۇمىسقا قايتا ورالۋى بولادى.
ماسكتىڭ كومپانيالارى پەنتاگونمەن ىنتىماقتاسىپ كەلەدى. SpaceX «التىن كۇمبەز» زىمىرانعا قارسى قورعانىس جوباسى ءۇشىن سپۋتنيكتىك جۇيەلەر جاساۋعا قاتىسىپ جاتىر، ال xAI Grok چات-بوتىن قۇپيا اسكەري جۇيەلەردە پايدالانۋ تۋرالى كەلىسىم جاسادى.