ينديانا شتاتىندا بىرنەشە كۇنگە سوزىلعان داۋىل مەن سۋ تاسقىنى كەمىندە التى ادامنىڭ ءومىرىن قيدى. ايماقتاعى وزەندەردىڭ دەڭگەيى تاريحي ماكسيمۋمعا جەتىپ، استانا يندياناپوليس تۇرعىندارى ەۆاكۋاسيالاندى. بۇل تۋرالى infohub.kz سايتى حابارلايدى.
شتاتتىڭ توتەنشە جاعدايلار دەپارتامەنتىنىڭ وكىلى ليز ۆۋدستىڭ مالىمەتىنشە، 11 تامىزدا باستالعان داۋىلدان 4 جاسار بالا، ەكى ەر ادام جانە ءۇش ايەل قازا تاپتى. ۋايت-ريۆەر وزەنىندەگى سۋ دەڭگەيى جەكسەنبى تاڭەرتەڭ ەڭ جوعارى نۇكتەسىنە جەتكەن. قالالىق قوعامدىق جۇمىستار دەپارتامەنتىنىڭ بولجامىنشا، سۋ دەڭگەيى بىرنەشە ساعات بويى جوعارى تۇرىپ، سودان كەيىن تومەندەي باستايدى.
وزەن بويىنداعى جانە كانالدار ماڭىنداعى جۇزدەگەن ءۇي تۇرعىندارى ەۆاكۋاسيالانعاندىقتان، قالاداعى باسپانالار ءالى دە اشىق. قۇتقارۋشىلار قاتتى كوتەرىلگەن سۋدا قالعان ادامداردى قايىقتارمەن الىپ شىقتى. ۇلتتىق اۋا رايى قىزمەتىنىڭ مالىمەتىنشە، كۇنى بويى يندياناپوليس پەن شتاتتىڭ ورتالىق بولىگىندە نوسەر مەن قاتتى سۋ تاسقىنى ءقاۋپى ساقتالۋدا.
قىزمەت تۇرعىنداردى وزەن دەڭگەيى مەن اۋا رايى بولجامىن قاداعالاپ، "ءقاۋىپتى، جىلدام اعىندى سۋدان اۋلاق بولۋعا" شاقىردى. قاتتى جاڭبىر ورتالىق يندياناداعى كوپتەگەن وزەندەر مەن بۇلاقتاردىڭ دەڭگەيىن كوتەرىپ، جولدار مەن كوپىرلەرگە ەلەۋلى زاقىم كەلتىردى، كەيبىرى مۇلدەم جۋىلىپ كەتتى. ۆۋدس پەن PowerOutage.us دەرەكتەرى بويىنشا، شتات بويىنشا شامامەن 130 مىڭ تۇتىنۋشى جارىقسىز قالدى، بۇل ەڭ جوعارى كورسەتكىش 300 مىڭنان تومەندەگەن.
وتكەن اپتادا ينديانادا قاتتى جاڭبىر جاۋىپ، وزەندەر تاسي باستادى. اندەرسون مەن نوبلسۆيلل قاۋىمداستىقتارىندا ۋايت-ريۆەر دەڭگەيى 24 فۋتتان (7،32 مەتر) اسىپ، 1913 جىلعى رەكوردتى جاڭارتتى. يندياناپوليس اكىمى دجو حوگسەتتىڭ ايتۋىنشا، بۇل استانا قالاسىندا سوڭعى 30 جىلداعى ەڭ اۋىر سۋ تاسقىنى. گۋبەرناتور مايك براۋننىڭ كەڭسەسى شتاتتىڭ باسقا ايماقتارىندا، ونىڭ ىشىندە ءيندياناپولىستىڭ سولتۇستىگىندەگى قارتتار ۇيىندە 350-دەن استام ەۆاكۋاسيا جانە كوپتەگەن قۇتقارۋ جۇمىستارى جۇرگىزىلگەنىن حابارلادى.
اقش پرەزيدەنتى دونالد ترامپ سەنبى كۇنى براۋننىڭ سۋ تاسقىنىنا قارسى كۇرەس جانە قالپىنا كەلتىرۋ جۇمىستارىنا فەدەرالدى كومەك كورسەتۋ تۋرالى ءوتىنىشىن قاناعاتتاندىردى. بۇل الاپات جاڭبىر مەن سۋ تاسقىنى سوڭعى كۇندەرى ورتا باتىس پەن ودان تىس ايماقتارعا زور زيان كەلتىرگەن قاتتى داۋىلداردىڭ سالدارى بولىپ تابىلادى. يللينويستان باتىس پەنسيلۆانياعا دەيىنگى ەلدى مەكەندەردە تورنادو، قاتتى جاڭبىر جانە سۋ تاسقىنى ۇلكەن شىعىن كەلتىردى.