فيفا پرەزيدەنتى دجانني ينفانتينو ءوزىنىڭ جىلدىق جالاقىسىن قازىرگى €3 ملن-نان €30 ملن-عا دەيىن، ياعني ون ەسەگە جۋىق ارتتىرا الار ەدى. مۇنداي سەناري الەم چەمپيوناتتارىنىڭ كوممەرسيالىق قۇقىقتارىنىڭ ءبىر بولىگىن ساتۋ جوباسى اياسىندا قاراستىرىلعان، دەپ حابارلايدى infohub.kz سايتى The Times-كە سىلتەمە جاساپ.
باسىلىمنىڭ مالىمەتىنشە، ينفانتينو فيفا كوممەرسيالىق اكتيۆتەردى باسقارۋ ءۇشىن قۇرۋدى جوسپارلاعان FIFA Forward Enterprise (FFE) جاڭا كومپانياسىن باسقارعانى ءۇشىن قوسىمشا بونۋستار الا الار ەدى.
ۇيىمنىڭ جوسپارلارى 28 شىلدەدە بەلگىلى بولدى. فيفا $20 ملرد باعالانعان FIFA Forward Enterprise قۇرىپ، كومپانيانىڭ 25% سىرتقى ينۆەستورلارعا $4،2 ملرد-قا ساتۋدى كوزدەگەن.
ب ا ق دەرەكتەرى بويىنشا، اكسيالاردىڭ شامامەن 20%-ىن دجوشۋا كۋشنەر باستاعان ينۆەستورلار توبى ساتىپ الۋى ءتيىس ەدى. ونىڭ اعاسى دجارەد كۋشنەر اقش پرەزيدەنتى دونالد ترامپتىڭ كۇيەۋ بالاسى.
Financial Times بۇل جوباعا بىرنەشە اي بويى JPMorgan، فيفا جانە كۋشنەر توبى جۇمىس ىستەگەنىن حابارلاعان.
الايدا بۇل باستاما فۋتبول فەدەراسيالارىنىڭ قاتتى قارسىلىعىنا تاپ بولدى. مامىلەگە ۋەفا، كونكاكاف، ازيا فۋتبول كونفەدەراسياسى جانە كونمەبول قارسى شىقتى. سونىمەن قاتار، ۋەفا-نىڭ بارلىق 55 مۇشەسى كەزەكتەن تىس جينالىستا فيفا بۇل جوبادان باس تارتپاسا، ونىڭ ەگيداسىمەن وتەتىن تۋرنيرلەرگە بويكوت جاريالاۋ تۋرالى شەشىم قابىلدادى.
سىننىڭ قىسىمىمەن 1 تامىزدا ينفانتينو فيفا الەم چەمپيوناتتارىنىڭ كوممەرسيالىق قۇقىقتارىنىڭ ءبىر بولىگىن ساتپايتىنىن مالىمدەدى. وسىدان كەيىن ۋەفا قازىرگى فيفا باسشىلىعى «تەك ۋەفا-نىڭ عانا ەمەس، فۋتبول وتباسىنىڭ كوپتەگەن باسقا مۇشەلەرىنىڭ دە سەنىمىنەن ايىرىلدى» دەپ مالىمدەدى.
بۇعان دەيىن The Telegraph ۋەفا ينفانتينوعا ۋلتيماتۋم قويعانىن حابارلاعان: نە وتستاۆكاعا كەتۋ، نە سەنىمسىزدىك ۆوتۋمىنا تاپ بولۋ.
دجانني ينفانتينو فيفا-نى 2016 جىلدان بەرى باسقارادى. ول بۇعان دەيىن كەلەسى جىلدىڭ ناۋرىز ايىندا ۇيىم پرەزيدەنتتىگىنە قايتا كانديداتۋراسىن ۇسىنۋ نيەتىن بىلدىرگەن.