Apple جاڭا ونىمدەرىن تانىستىرۋ شاراسىندا تاريحتاعى العاشقى بۇكتەمەلى iPhone-دى ۇسىندى، دەپ حابارلايدى infohub.kz.
iPhone Duo-دى كومپانيانىڭ جاڭا باس ديرەكتورى دجون تەرنۋس تانىستىردى. ول بۇعان دەيىنگى بارلىق بۇكتەمەلى سمارتفونداردىڭ قاتە جاسالعانىن ايتتى. Apple بۇل جاڭالىقتى 10 جىلدان استام ۋاقىت ازىرلەگەن. «iPhone Duo ءسىز بۇرىن كورگەن كەز كەلگەن iPhone-عا ۇقسامايدى. ول مۇلدەم جاڭا، ءبىراق سونىمەن بىرگە تاڭعالارلىقتاي تانىس. كولەمى جاعىنان پاسپورتىڭىزعا ۇقسايدى»، — دەلىنگەن كومپانيا حابارلاماسىندا.
ۋنيان دەرەكتەرىنە سايكەس، iPhone Duo ەكى ەكراندا دا USB-C نۇسقاسىنداعى Apple Pencilء-دى قولدايدى. Dock جانە قۇرالدار تاقتاسى كىشكەنتاي ەكراننىڭ وڭ جاعىندا ورنالاسقان.
iPhone Duo-دى كەز كەلگەن پوزيسياعا بۇكتەۋگە بولادى، ال iOS ينتەرفەيستى بەيىمدەيدى، سونىڭ ىشىندە مۋزىكا، كۇنتىزبە نەمەسە اۋا رايى سياقتى ۆيدجەتتەرى بار «شاتىر» رەجيمىندە دە. سونىمەن قاتار، Apple Netflix جانە باسقا تانىمال قولدانبالاردىڭ ازىرلەۋشىلەرىمەن بىرگە ولاردىڭ ينتەرفەيستەرىن جاڭا ەكران فورماتىنا بەيىمدەگەن.
بەينەنى ويناتقان كەزدە ىشكى ەكران 31 ساعاتقا دەيىن، ال سىرتقى ەكران 44 ساعاتقا دەيىن جۇمىس ىستەيدى. جاڭا ءونىم تەك ەكى تۇستە شىعادى: كۇمىس جانە قويۋ كوك.
ەندى بىرەگەي سمارتفوننىڭ سيپاتتامالارى تۋرالى. ربك جازعانداي، ولاردىڭ قاتارىندا: تيتان جاقتاۋ؛ ەكران استىنداعى FaceTime كامەراسى؛ iPhone 18 Pro Max-تان 50% ۇلكەن جانە iPhone 18 Pro-دان 80% ۇلكەن 7،6 ديۋيمدىك Super Retina XDR ديسپلەي؛ بۇكتەلگەن كۇيدە پايدالانۋشىعا 5،4 ديۋيمدىك پانەل قولجەتىمدى؛ iOS جاڭا فورماتقا ارنايى بەيىمدەلگەن، كوپ تاپسىرمالىلىق پەن ۇلكەن ەكرانداعى باسقارۋ ەرەكشەلىكتەرىن ەسكەرەدى؛ كامەرا جۇيەسى ەكى 48 مەگاپيكسەلدى سەنسوردان تۇرادى — نەگىزگى جانە ۋلترا كەڭ بۇرىشتى. كومپانيا تەگىس يكەمدى بەتتى، كورىنەتىن جارىقتار مەن باسقا دا ادەتتەگى «اۋرۋلاردىڭ» ازدىعىن ۋادە ەتەدى.
جانە، ارينە، باعالار تۋرالى — iPhone Duo 256 گب ءۇشىن 1 999 دوللاردان (شامامەن 908 مىڭ تەڭگە) باستالادى، ال 2 تب جوعارعى نۇسقاسى — 2 999 دوللار (1 ملن 360 مىڭ تەڭگەدەن استام). الەمدىك ساتىلىم 23 قازاندا باستالادى.