ارالاس جەكپە-جەكتەن (مما) رەسەيلىك فايتكەر يسلام ماحاچيەۆ فيلادەلفيادا وتكەن UFC 330 ءتۋرنيرىنىڭ باستى جەكپە-جەگىندە يرلانديالىق يەن ماچادو گەرريدى جەڭدى، دەپ حابارلايدى infohub.kz سايتى.
بۇل جەكپە-جەك ماحاچەۆتىڭ جارتىلاي ورتا سالماقتاعى (77،1 كەلىگە دەيىن) چەمپيون رەتىندەگى العاشقى كەزدەسۋى ەدى جانە ول ءوز تيتۋلىن ءساتتى قورعادى. ونىڭ قارسىلاسى ماچادو گەرري ديۆيزيوننىڭ ءبىرىنشى ءنومىرى رەتىندە كەلدى.
باسەكە بارلىق بەس راۋندقا سوزىلدى. ەكىنشى راۋندتا رەسەيلىك قارسىلاسىن نوكداۋنعا جىبەردى. جەكپە-جەك قورىتىندىسى بويىنشا تورەشىلەر ءبىراۋىزدان ماحاچەۆتى جەڭىمپاز دەپ تانىدى (49:46، 49:46، 48:47).
34 جاستاعى سپورتشى ءۇشىن بۇل جەڭىس UFC-دەگى قاتارىنان 17ء-شى جەڭىسى بولدى، بۇل ۇيىم تاريحىنداعى ەڭ ۇزاق جەڭىس سەرياسى. بۇعان دەيىنگى رەكورد برازيليالىق اندەرسون سيلۆاعا تيەسىلى ەدى — قاتارىنان 16 جەڭىس.
ماحاچەۆتىڭ كاسىبي مانسابىندا بارلىعى 29 جەڭىس جانە ءبىر عانا جەڭىلىس بار. ول بۇعان دەيىن UFC-دە جەڭىل سالماقتا (70،3 كەلىگە دەيىن) دا چەمپيون اتانعان.
ماچادو گەرري ءۇشىن بۇل مانسابىنداعى ەكىنشى جەڭىلىس. العاشقىسىن وعان قازاقستاندىق فايتكەر شاۆكات راحمونوۆ جىبەرگەن ەدى. 28 جاستاعى يرلانديالىقتىڭ ەنشىسىندە 17 جەڭىس بار.