يتاليادا وفتالمولوگيا سالاسىندا سەرپىلىس جاسالدى: دارىگەرلەر الەمدە العاش رەت كوز تورىنىڭ ورتالىق بولىگىن ءساتتى اۋىستىرىپ، اپاتتان سوڭ سوقىر بولعان ايەلدىڭ كوزىن اشتى، دەپ حابارلايدى infohub.kz.
تۋريندەگى مولينەتتە اۋرۋحاناسىندا التى ساعاتقا سوزىلعان كۇردەلى وپەراسيا جاسالدى. پروفەسسور ميكەلە رەيبالدي باستاعان حيرۋرگتار توبى مەديسينا تاريحىندا العاش رەت پاسيەنتكە ماكۋلانى — ايقىن ورتالىق كورۋگە جاۋاپتى كوز تورىنىڭ ورتالىق ايماعىن اۋىستىردى. ماكۋلامەن قاتار ءمولدىر قابىق، سكلەرا جانە ونىمەن بايلانىستى دانەكەر تىندەر دە اۋىستىرىلدى.
پاسيەنت — بىرنەشە جىل بۇرىن اۋىر جول-كولىك وقيعاسىنان كوزىنەن ايىرىلعان 67 جاستاعى ەلەنا. اپات كەزىندە ونىڭ سول كوزىنىڭ كورۋ نەرۆى تولىق ۇزىلگەن، ءبىراق قالعان تىندەر زاقىمدانباعان. وڭ كوزدە جاعداي كەرىسىنشە بولدى: كورۋ نەرۆى ساقتالعان، الايدا كوز تورى مەن ءمولدىر قابىق جويىلعان.
پروفەسسور رەيبالدي ەكى كوزدىڭ ساۋ بولىكتەرىن بىرىكتىرۋگە شەشىم قابىلدادى. حيرۋرگتار سول كوزدەن زاقىمدانباعان تىندەردى الىپ، ولاردى وڭ كوزگە اۋىستىرىپ، جۇمىس ىستەپ تۇرعان كورۋ نەرۆىنە قوستى. تاڭعىشتار الىنعاننان كەيىن ايەل ءوز ۇلى مەن دجو ەسىمدى ءيتىن كورىپ، تاني الدى. كەيىنگى تەكسەرۋلەر تىندەردىڭ ءساتتى جازىلعانىن راستادى.